سحاب بيتنا

سحاب بيتنا.. 

سحاب بيتنا مبيمطرش

وليه نهارنا مبينورش؟

وليه العتمة في قلوبنا 

مبتفكرش..؟

مبتفكرش تمشي ف يوم.. 

وتنسانا..

كأن وجودها جوانا.. 

بقرار رسمي.. 

قرار رسمي وتنفيذه

ده شيء محسوم.. 

يا ست العتمة فارقينا.. 

وخلينا.. 

نحس بفرحة بس في يوم.. 

ولو عوزانا نمضيلك على تعهد.. 

بإن الصبر جوانا خلص صبره..

هنمضيلك.. 

وهنجيلك.. 

لحد هناك نغنيلك.. 

لكن وحياة سهاد كسرة مواويلك.. 

تخلي الشمس تطرح نور قصاد بيتنا.. 

وخلي سحابة الفرحة تحاوطنا.. 

ليوم واحد.. 

ووعد أكيد هنرجعلك.. 

بلون الحزن في ملامحك 

وأوجاعنا.. 

هتيجي معانا بالتأكيد 

لا هتفارق.. ولا هتنسى

ولا هتسيبنا نمشي بعيد.. 

يا ست العتمة ردك ايه على كلامنا.. 

هتنسينا ليوم واحد خلاص مرة؟؟

تعبنا نداري من برة.. 

وجوانا بينزف جرح طبعه عنيد

وحلم الفرح مخاصمنا.. 

ولسه بعيد..

سحاب بيتنا.. 

سحاب بيتنا مبيمطرش.. 

ونور صبحه ملوش مواعيد..