قالولك ايه..؟

قالولك إن أنا عايشة

ومش فارق معايا البعد!!

قالولك رمشها مضوي

وضحكة قلبها تلون خدود الورد

قالولك عايشة مبسوطة 

ودقة كعبها عالية

ورنة صوتها دي قوية..

كفوف روحها.. محنية

سحاب لياليها بينادي

علي الفرحة..

فتتمهل.. وتتجمل..

وتيجي أوام..

وقالوا كمان 

بإن حياتي ف غيابك 

بقت جنة ولا الأحلام

وإني أتمنى بس الشيء..

بساط أمانيا ينقلني لسنين قدام..

قالولك إن أنا عايشة وراسي لفوق

وكنت فاكرني هتحسر

ونبض وتيني يتكسر 

لأ إعقل...

فووق..

وفكر بس في كلامي

وعيش مسجون في أيامي

وشبك روحك القاسية

على جدران هوى غرامي..

زمان حبي ده ولى خلاص

قفلت بيبانه وبإخلاص..

معدش باقيلي من حكاويك..

غير ذكرى ف كلام الناس