وجع الألم .. طعم الأنين..
رغم البعاد .. طارح سنين..
طارح دفا.. وسنين وفا..
متكتفه
بنزف الحنين ..
شوق اللقا وهمس السكات ..
مليت بقا من الذكريات..
وتعبت أستنى اللي جاي ..
وتعبت أنادي ع اللي فات ..
ف بقولك إية...
شوفلك طريقة في بعدنا
تشبهلنا..
نقدر نكمل بيها سكة عمرنا..
نقدر نفوت ع الذكريات
متهزناش..
نقدر ننادي الشمس
ف تجينا ببلاش..
من غير ما ندفع من قلوبنا
لضيها..
من غير ما نرشي الفجر
عشان يندهلها..
خليها ترجع وتنادينا لحضنها..
من نفسها..
وبقولك إيه..
شوفلك في قلبي
منطقة .. جوا البعاد..
أو شوف طريقة في بعدنا..
تشبهلنا..
يا تمَوت الشوق اللي فاضل
جوا مني..
يا إما من الآخر كده..
موتني أنا..