وف بعادك أنا عايشة..

أنا عايشة بصحيح جدا

لكن عايشة في تفاصيلك..

وحرة أكيد لكن روحي..

دي مسجونة ف كفوف ليلك 

أنا عايشة ف بعادك آه

لكني عايشة مطفية

مفيش ولا روح ولا نبضات

ولا إحساس فضل فيا

كأن الفرحة حالفة تسيبني ف غيابك

وقلبي اللي إنت خدته زمان

وتبت فيك..

نسيت مفتاحه على بابك

وأنفاسي اللي جوايا 

بتتنهد وتدبحني

ودقة قلبي في غيابك بتجرحني..

ده حتى النور ملوش معنى وإنت بعيد

لكني هكمل المشوار ومش هرجع 

وده اللي أكيد..

تقول قاسية..

وقسوتها دي ملهاش حد

تقول ناسية لأحلامنا..

معنديش رد..

كفاية إني أكون عارفة 

بإنك لسه جوايا..

وإن حنيني مفارقنيش 

وطول الوقت ده معايا..

فأرجوك يعني من فضلك 

متسألنيش ومتكترش

عشان أقدر أكمل رحلتي ف البعد..

عشان مضعفش 

ولجل عيونك الغاليين 

هفكر قلبك النساي..

قرار البعد خدناه إزاي...

بعدنا زمان عشان دنيتنا تتجمل

عشان نقدر نعيش أيامنا ونكمل

ولو كان بعدي عنك يوم بيوجع فيك

ف دوس ع البعد واتحمل