الليل نايات

الليل نايات..

وسط السكات والذكريات..

يسرد آهات العاشقين..

والرافضين..

لموت جنون الأمنيات..

وينادي نجمة الحنين..

من وسط غيم الشوق ساعات..

فتعيد حكاياتنا القديمة

اللي افتكرنا أن الدروب

مسحت خطاها من سنين..

وتسيب شبابيك الهوى..

تفتح بيبان لخيوط قمرنا

اللي انطفت روحنا..

مع ضيه الحزين

ف الاقي قلبي اللي انت سيبته

ف عتم نبضك لسه حي..

والاقي رعشة لمستك..

لسه بتطرح جوا قلبي ألف ضي

وجنوني بيك..

واللي افتكرته نسيك 

يجيك.. ينده عليك..

ويصحصح الشوق اللي تحت

سهاد عنيك..

شبك إيديك يلا على كفوف لهفتي..

واسمع تراتيل همستي..

هتقولك اللي مش قادرة أقولهولك أنا..

واستنى ويايا هنا..

أول خيوط نور فجرنا..

نتوضى بدموع الحنين..

ونعيد حكاية حب خلصت من سنين..

هقيم صلاتي ف قِبلتك

وينطق سكاتي بهمستك..

وتدوب آهاتي ف بسمتك

وتحضن عيوني شطوط إيديك

وساعتها بس هقولها ليك..

لساني فاكرة رعشة القلب اللي داب..

جوا لهفة ضمتك.