مكنتش أعرف
أن حزني هيبقى وحش
ممكن بغدره يهدني
ويكسر عزيمتي
ولا كان ف بالي أن الألم
ف لحظة هينخور ف قلبي
ويقتل بوادر فرحتي
ولا كنت يوم أبدًا هفكر
إن حلمي هيبقى ذكرى
وتضيع معالم سكتي
كل اللي حاسس بيه ندم
على طيبة القلب البريء
وف كل لحظه
بلعن سذاجتي وضحكتي
خايف من الجرح اللي غاير
وفِكر من أوجاعي حاير
يقلب معالم دنيتي
وأنا اللي طول عمري الحمول
وبقولها دايمًا
ده اللي يصبر راح ينول
ليه النهارده يبيعني صبري ويختفي
لما بفكر ويا نفسي
بلاقيني جوايا اتهزمت
ف بقفل عيوني عن الحقيقه
بدل ما أموت من قهرتي
ولما افتح ..
بشوف ظنوني
واقفه بتطلع لسانها وتبتسم
وتقولي هاااهااهاي
صدقت نبوءتي
يبدأ صراخي يتحشر ف قلب جوفي
وأحس رعشه من الوجع
اللي متعبي بعذابي ويا خوفي
علشان خلاص بقيت بطولي
ولازم اعدي لوحدي وأنا شايل همومي
زي اللي تايه ف الغربه وحده
من غير دليل أو إيد تساعده
بس شعرة نور ف قلبي
لسه باقيه
وفيها عافيه
شايفها بتشق الظلام
وتقولي كمل
كمل لوحدك
غير الكون بابتسامتك
وطهر نفوس الناس
بغشمك الخايب اوي ووياه سذاجتك
متتكسفش .. متنهزمش
عادي تكون مش عادي
عادي
انت دايمًا مختلف
2
-2
