"" اتعلِّم """

اتعلِّم تنسى

حاول تدفن كل الذكرى

وتعيش من تاني

من غير ولا منطق ولا فكرة

ولا أي أساس

فكك من حزنك ومشاعرك

وبلاها الحساسية الزايدة

أحسن تنداس

وبلاش الدمعة الخيبانة

اللي تصغَّر أوي منظرنا

أدام الناس

لازم تعقل ويكون لك شأن وهيبة

مش كلمة حاضر وخلاص

ارفض بذكاء خليك موزون

ليه دايمًا ترضى؟

وعلى أي أساس؟

اعمِلك سعر وقيمة

دي الطيبة يا فالح دلوقتي

قلة قيمة

هيقولوا عليك خيبان محتاس

وكفايا تنطيط بلا شغل عيال

وتقولي دا هدفي وأحلامي

ههههههههه

طب دا اسمه كلام؟

صحيح خيبان

دا خيال إحساس

الدنيا يا صاحبي لأصحابها

ناس تعرف تجري وتلاعبها

حاسبين حساباتهم وحسابها

والناتج دايمًا مضمون

بحساب ومقاس

ناس تاخد حقها بدراعها

وناس تسرق حقنا بخداعها

وناس تاكل كل حقوق الخلق

ولا عمرها داقت أوجاعها

وناس تانية يا حسرة على خيبتهم

عاملين للكل الخد مداس

فوق واصحى معايا

دي الدنيا وناسها وأحوالها

اركن واتفرج

دا محدش قادر يجاريهم

حتى الوسواس الخناس

آسف واللهِ

حقك على راسي متزعلشي

أنا أصلي صريح

وصراحتي خدتني وودتني

قوتني ساعات

وأكتر أوقاتي سابتني جريح

رفعتني لعالي وهدِّتني

وممكن نصفتني وظلمتني

يووووووووه!

خلاصة القول:

لازم هتدوق

ف بقولك إيه

حاول تتعلم تستحمل

كل الأشكال والأجناس

#اتعلم