رماد الكبدة

اييه أولد كرشي ألكبدة

راه ڨالو ناس زمان فحالنا

كيما تدير يدارلك بالعودة

وكلنا فيوم نوديو ما يتسالنا

ياك الحنين اللي ستنيتو سنين

ياك الغالي اللي سهرت عليه ليالي

أنت تاكل وانا نجوع معليش

انت تكبر وانا دايرة راسي نعيش

واكبر عظمك وطوالت القدة

وقفتي على رجلك وحسابلك راجل

ثقال عليك همي ياقليل الأصل

وجاي ترميني فأيام الشدة

قالو الدنيا تبدلات، وكل قلب بكيتو

قلت ميمكنش وليدي ينسى ميمتو

قالو الجيل تالف، وكلها فين صاد

جيل عايش بلا جذور ولا وتاد

قلت كبدتي شافني نطيح وانوض

مربيتوش على الظلم والجحود

لكن هاذ المرة غلط قلب الأم

ولباب الخيرية جابني ولد الهم

ياك رضعتك من حليبي وما شكيت؟!

غطيتك برضايا حتى رضيت

نتا مرضتي وانا سهرت وبكيت

تبعتك بدعاوي الخير والتيسير

واليوم أنا طاحت صحتي وتقاديت

خانتني ليام وتسالالي التدبير

عييت نهضر والقلب تكمم

وما بقالي غير ندم فوق ندم

يا ما عطيت بلا حساب ولا منّة

واللي ربيتُه... نكر العشرة ولمحنة

طاوعت قلبك وسمحتيلو يقسى

نطلب ربي يهديك ويقدرني يوم ننسى..