حنا وتاد لبلاد

ضرب أخويا وزيد عاود

لكية وحدة والهم واحد

السفينة ايلا غراقات كلنا فخبر كانوا هنا

واشمن خاوة ايلا متتشاركناش المحنة؟!

فالفرح مجموعين يد فيد

واليوم لكحل يتصدر للعبد

راه البكمة ومتفرطش فصغارها

واحنا كنتقاتلو عالدنيا وحجارها

آش هاذ الشوهة واش هاد الحالة؟!

هاذو باش محزمة لبلاد وعلامن عوالة؟!

الذيابة باعوا النعاج جملة فالدلالة

وسوق النخاسة زاهي بالبياعة والطبالة 

آش هاذ المصيبة وآش هاذ المهزلة ؟!

راه الواد حمل وتڨرع سرارو

القلب اللي سكت فار وڨادت نارو

تعرات الكذبة المزعومة

وتفطم الرضيع أماما الحكومة

قطعوا حبال لكذوب

وفاض كاس الشعوب

الأمان والكرامة تڨيحو فلقلوب

جا وقت المحاسبة وجرد

الذنوب

المثقف حنطوه وطلقو علينا الجهالة

لكن.. الحق حبلو طويل وطريقو مايتسالا

بلا مزايدات على حبنا اللبلاد

فحنا ظل جذورها. وحنا لوتاد

الأرض أمانة نرويوها بالدم...

..بالروح نفديوها ونحافظو عالقٓسٓم

الله الوطن الملك

وتحيا بلادي حرة تتبسم.