قصة حقيقية صغيرة حصلت لى من يومين سأحكيها لكم وهذا ما حدث بالضبط وهحاول اختصر قدر الامكان:
ذهبت غرفة نومى بعد يوم شاق كنت فى رحلة تسوق وافرغت اكياسى فى الدواليب وكنت هذا اليوم بمفردى فى المنزل دخلت السرير وطفيت النور لانام واذا بصوت يتحرك فى الغرف حاولت أقرأ كل ما احفظه من قرآن واستمر الصوت ..أشعلت الابجور بجوارى وطبعا بالعافية طلعت زراعى من تحت الغطاء وانا خائفة أن لا يعود ثانية ...لم أجد شيئا واستمر الصوت فقلت لنفسى ايه يعنى عفريت هيطلعلى هيعملى ايه؟ هايقولى عو ..واستمر الصوت وطبعا انا متأكدة انه لا يمكن أن يكون فأر لانى احكم إغلاق المنزل بعناية بما انه فيه حديقة حولى فالمتوقع أن يكون هناك حشرات وما إلى ذلك.. والصوت مستمر..قلت لنفسى يارب يكون عفركوش بتاع الفانوس السحرى ..خيال وكل ده وانا مجمدة تحت الغطاء .. وبدأت أجهز الرغبات اذا كانوا ٧ رغبات او يكون من النوع بتاع ٣ رغبات هطلب ايه؟ ..قررت ((اول رغبة)) اطلب ايقاف الحرب وتعود البيوت سليمة والمهاجرين إلى منازلهم فى غمضة عين وكأن شيئا لم يكن وبعدين فكرت قلت لو عفركوش من ابو ٣ رغبات احتمال يعتبر الطلب ده يتكون من ٣ طلبات ( الحرب تقف، والبيوت ترجع سليمة،والمهاجرين يرجعوا بيوتهم) وطبعا انا مش هستفيد حاجة ومفيش حد هيعرف انى انا إللى حليت المشكلة ... فقلت لو عفركوش من ابو ٧ طلبات هعمل كده ويبقى عندى باقى ٤ طلبات فى الحالة دى هطلب واعيش حياتى اكيد فلوس ودهب وياقوت..وبعدين قلت ايه ده فين مصر من احلامى والله العظيم كل إللى بحكية ده كان فى ثوانى على ما يظهر عفركوش ..قلت هطلب لمصر دوام الستر والأمان والخير الوفير وطبعا اولادى ربنا يحقق كل امانيهم ..المهم الصوت بدأ يهدأ ولكنه موجود فجلست وأشعلت نور الغرفة وبدأت احدد مكان الحركة واذا هو كيس بلستك من النوع الشفاف قد كرمشته ووضعته فى سلة الزبالة بالغرفة وبدأ الكيس يتفكك تدريجيا شكرت الله اننى لم ارى عفركوش لان اكيد كان قلبى هيقف ولن استطيع طلب اى شئ فالصحة اغلى من كل كنوز الدنيا وان شاء الله ربنا يستجيب لامنياتى فهو خير مجيب
2
-2
