ركن فاضي

كل واحد فينا جواه ركن فاضي..

ركن بعيد عن زحمة يومنا...وهادي ..ومنعزل عن تفاصيل حياتنا الممله..

ركن بيحسسنا إن لسه لوجودنا معنى وقيمة

ركن بنتونس بيه ..وبيتونس بينا..

ركن متعلق على بابه أحلامنا وأمنياتنا إلى الأيام عجزت عن تحقيقها..

ركن أول ما تدخله تشم فيه ريحة أغلى الحبايب إلى الأيام حرمتنا منهم..ونشوف على جدرانه صورهم المحفورة عليه وكأننا لسه سايبنهم إمبارح..

ركن زرعنا فيه أجمل زهور حبيناها..

واول وردة قطفناها لحبايب قلوبنا..

ركن هاتلاقي فيه نفسك وإنت صغير وتفتكر أجمل لمة عيله ..وأجمل صحبه ...واطعم لقمه

وأعلى ضحكة..

ركن حاتشوف نفسك مع اول حب..واول نظرة حلوة خطفت قلبك..وأول رعشة إيد وانت بتسلم عليه..واول كلمة حلوة أتقالت من غير ما تتنطق..وعيون بتلمع من فيض مشاعرك الصادقة..ولهفة أول مقابلة مسروقة وأنت خايف لحد يشوفك...ورسالة حلوة مستنيها فى كتاب المدرسة بتفكرك بميعاد بكره..وشريط كاسيت فيه أغانى عاوز تقول كل كلمه فيها لكن مش عارف تعبر عن إلى جواك إلا من خلالها...

وصوت دافى جميل لنبرة أجمل من حبيب قلبك وهو بينده بإسمك..ويقولك وحشتني..

ووردة جميلة منه زرعتها علشان تفضل عايشة جوه الركن الفاضي ..

ركن حاتفتكر جواه كل تفاصيل عمرك وكأنك عارض شريط سينما شايف فيه عمرك إلي ضاع منك على غفلة..

ركن فاكرين فيه كل إلى حاولت تنسيه لينا الأيام ومقدرتش..

ركن بنعيد فيه ترتيب حياتنا..ونفكر بتمعن فى حل مشاكلنا وأحنا بنشرب فنجان قهوتنا ..

ويمر الوقت بسرعة وتفتكر حياتك وننشغل بهمومنا ونسيب مكانا الهادي بس على وعد بلقاء قريب فى ركننا الفاضي ..