الحب الذي ينتهي لم يكن حباً

وقعت عيني دلوقتي علي الجمله دي ووقفت قدامها شويه وفكرت فيها ، لكن الحقيقه انا ضدها جدا ..

لأن أقوى حب في العالم ممكن ينتهي ويخلص ..

الحب أصلا عامل زي النبته أو الوردة

 لازم تتسقي وتتحط في الشمس عشان تكبر وتزهر ..

عمرها ما هتكبر وهتبقي ورده جميلة من غير ميه وشمس .. ولما نمنع عنها الميه والشمس هتموت

وميبقاش ليها اي وجود ..

الحب بيخلص وينتهي مهما كان حب قوي وعظيم مادام ملقاش المقومات اللي تخليه يعيش ويتنفس ..

لما توجع حبيبك وتزعله الشمس والميه هتقل .. 

لما يحتاجك ومش يلاقيك جمبه ومعاه الشمس والميه هتقل ..

لما يهون عليك تعبه ووجعه ودموعه ويبقوا بالنسبه ليك عادي الشمس والميه هتقل ..

لما يستني منك شوية حنان واحتواء وإهتمام ،

ويبقي نفسه فى كلمه حلوة منك تطيب بيها خاطره وتستكترها عليه الشمس والميه هتقل .. 

لما تقسى ، لما توجع ، لما متراعيش مشاعره ، لما متشتريش خاطره ، لما تعمل اللي يضايقه وكأنه ملوش اي قيمه الشمس والميه هتقل ..

هتموت الورده وتدبل وتترمى ، وهيموت حبك جواه ويخلص ..

هيقسى.. يتغير.. ويتحول الحب اللي جواه لزعل وقسوه ، والحب اللي كان بالنسبه له حياه

نفسه يعيش فيها طول العمر

يتحول لوجع واحساس بالاهانه ..

التفاصيل.. والمعامله قادره تحول الانسان ١٨٠ درجه .. متستغربش لما تلاقي حد حب بروحه وقلبه ومشاعره

وكل ما فيه ويبعد فجأة وحبه ينتهي ،

لما تلاقي حد ماكنش شايف في الدنيا والكون والناس

غير حبيبه والحب يموت جواه ..

لما تلاقي اللي مكنش يقدر يستغنى لحظه عن اللي بيحبه قادر يعيش ويكمل ويفرح وهو بعيد عنه ..

الحب بيموت وبيخلص من الاهمال

والمعامله القاسيه وقلة التقدير وعدم الاحتواء ..

الحب بيموت ويخلص ..

وكل ما الحب كان اكبر

كل ما الموته بتكون قاسيه اكتر..

حبوا صح.. علشان تعرفوا قيمة الحب صح 

Ahlam Elsaid