ولد فلاح و قلبه فى العسل سواح

عيونه غناوى مصرية

عبيره المشمش الفواح

يحلّق جوه ننى العين

و يفرش فى الغيطان افراح

تحنن ضحكة الحلوين

و شوقه يجنن الشياطين

فترقص له ملاغية

و لد فلاح

و عنده فى الغرام قدره

بيلضم من الدفا حكاية

يوشوشها لشمس اليوم

تبات تسهر فى شوق بالليل

و تغزل له فى نور بكرة

و يااانى

ياااانى لما قلبه يدوب

و احسه

جوه حلم جميل

بيلمس فى العيون ترانيم

يلفلف عمرى فى الأزمان

وقلبه جوه قلبى ينام

يقسم نبضتى اوتار

و يعزفنى بلهيب لهفه

و الاقى كلى عنده يروح

فيغزل لى برمش الروح

جناحى و اجرى له و اطير

ارفرف زى فرد حمام

جناحه جوه حضنى ينام

يحط برأسه فى حجرى

و أفرد له انا فى صدرى

براحى و هو فيه يرتاح

و لد طراح

عبير بيهف من الجنة

يمس بنوره على الدنيا

تميل بكفوفها تتحنى

و لد

فى دراعه شجراية

بتفرش فى السحاب خضره

تطرح فى السما تفاح

ولد

فلاح

#عامية_امل_درويش