انا اول مافتحت عنيا
فتحتها على جنة فى أسكندرية
و عليك انت
و شجرة مرشقة تفاح
فى كل يوم الصبح
نفتح عيوننا و نذكر الفتاح
و فى يوم صحيت من النوم
لقيتك قاطمها !!!
و الرب غضبان بشدة
الموج بيهبد فى بيبان البيوت القديمة
و الريح بتاكل فى ازاز الشبابيك
الرعد بيكهرب عمارات محطة الرمل
و الشتاء سيول بوشت الأسفلت الرخام
مش عارفة ليه ربنا سابك
و ساب الشياطين تمسك فى خناقى :
هى السبب
هى اللى وزت قلبه الضعيف و خلته يقطم الشجرة
يا ربى و غلاوتك هو اللى راح عمد مع سبق الترصد
انا كنت بخيط قميص نوم جديد البسهوله يمكن يبطل بصبصة
هو اللى ضعيف و ماحدش عارف يحاسبه
فضلت اصرخ و ابكى لربنا يمكن ....
لكن ماوصلتش لأى نتيجة
لا الشيطاين ادتنى فرصة افسر
و لا الملايكة جت فى صفى
و الحكم كان قاسى قوى عليا
تطلع من جنة اسكندرية فى الحال
و تنزل جهنم روما فى ايطاليا
و ادينا نزلت
نزلت و شفت العجب يارب
و هو نزل ورايا
و بشوف منه العجب يارب
يارب ارجوك نزلى سلم من السماء اطلع لك
و لو مافيش سلم
نزلى حبل اتسلقه
ابعت لى طير و انا اركبه
طب حيط كبير اتشعلقه
طب عزرائيل يشلنى اليك انا راصية
أرجوك
مش عايزة اقعد معاهم على الأرض يارب
مش عايزة ابقه زيهم
و لا هم راضين يسبونى زى ما انا
خمسين سنة حرب مولعة فيا
و غلاوت رسولك انا تعبت يارب ْ •