كانت جدتى والدة بابا سيدة كريمة و طيبة و بنت عائلة كبيرة ؛ كان اسمها شوربجية _ اسم غريب لكنه نادر و جميل _ كانت سيدة معمرة توفيت بعد ما تمت حوالى 120 سنة تقريبا؛ و كانت بتعيش فى بيت عمى ابن حزب الوفد المغرم بالسياسة عضو مجلس الشعب السابق الاستاذ #أحمدردويش الله يرحمه ؛ فى مرة روحت ازورهم و كانت زمزم بنتى مولودة كان عندها حوالى ٨ شهور؛ دخلت قوضة جدتى بصت بحظر شمال و يمين و قالت لى : أقفلى الباب ؛ قلت لها : ليه يا جدتى ؟ ؛ قال لى اقفليه و بس ؛ ابتسمت لها و قفلت الباب و رجعت لها . قالت لى : انتى بنت السيد ابنى ؟ انا اعرفك كويس و بحبك قوى و ضمتنى فى صدرها بقوة و حنين و حب و سألتنى : انتى بنت مين من الستات اللى اتجوزهم ابنى ؟ قلت لها انا بنت الزوجة الاسكندرانية؛ قالت لى امك الأسكندرانية؛ بس انتى بيضاء و حمراء و ذينا وشك تركى يابنت ???? ؛ انتى امل صح ؟ قلت لها : أة . قالت لى و إيه اللى على كتفك ده بنت و لا واد ؟ قلت لها بنت اسمها زمزم؛ بصت لزمزم و اخدتها و ضمتها فى صدرها بقوة و فضلت تبوس فيها و طلعت كيس قماش عليه شغل قديم جميل بالدانتيل مربوط بحبل فى رقبتها و كان متخبى فى صدرها؛ مرة تانية بصت شمال و يمين و طلعت جنيه واحد عليه صورة الملك فاروق و قالت لى : خدى خبيه خبيه اياكى حد يشوفه معاكى؛ قبل ما ترجعى بيتك اشترى شوال رز؛ و صفيحة سمنة؛ و حلق دهب للبنت الحلوة دى؛ و الباقى حطيه فى شنطتك و قولى لجوزك جدتى عطتنى هدية ولادة البنت :)؛ انا اخذت الجنيه و قلت لها: الله ده شكله تحفة قوى يا جدتى ؛ قلت لى دى فلوس الملك؛ فلوس جدك ؛ سالتها انتى عندك كم سنة يا جدتى ؟ قالت لى انا مش عارفة ؟ لما جدك مات كان عندى 50 و لا 60 سنة؛ سالتها : طب جدى مات من كم سنة يا جدتى : قالت لى : مات من يجيى من 50 و لا 60 سنة :) ؛

 المهم ان الجنيه ده لسه فى حاجاتى و انا بحب الست دى قوى الله يرحمها و يغفر لها ????