بقالى اكتر من سنتين

و ملامح الناس متلخبطة فى عنيا

مش لاقية وش يشبه حد انا اعرفه

انا بشوفهم كل يوم و متأكدة .....

مافيش حد فيهم يعرف التانى ابدا

لكنى حسه انهم متفقين يجننونى

ابنى بقه شبه مراته بالملى

و مراته شبه امنة مرات ابويا

بنتى شبهى خالص 

و عيالها شبه قلبى

امى مالهاش فى الدنيا شبه

بس صوتها شبه ملاك 

طردوه من الجنة من شدة غروره

ابراهيم كل دقيقة بشبه

و كل شبه داخل مع الأشباه التانية ....

مسابقة فى التفوق و كوى الوجع

محمد شبه ابويا ادم 

دايما ساكت بس لما تكلم 

قالى تعالى ...

و مسك ايديا و خرجنى انا و هو من الجنة

انا ..... انا كنت شبهى زمان

بس حد حاقد طلع مطول من جيبه

و قطع لى وشى

عينيا وقعت منى على الأرض و اتفقعت 

و شفايفى من كتر الجفاف شربت دمى علشان تطرى

ماكنتش شايفة و لا اقدرة اوطى الملمنى

فقلبى نزل يلملم اللى وقع منى

داسوا عليه فى الخناقة مات .

#عامية_امل_درويش

#حالة_نفسية