مافيش فى جسمى حتة مافيش فيها وجع
و كل وجع فى كل حتة حدوتة
الشعر حدودتة
العمر حدودتة
الثورة حدودتة حتى و لو ماتت
الضحكة البهتانة حدوتة مجروحة
و الغربة الحيرانة .....
حدوتة لجراحة روح بمشارط مفتوحة
ابويا حدوتة
امى حدودتة
و ستى كانت فى العمر احلى حدوتة
اسكندرية حدوتة الحواديت
الصيادين و القلعة و السيالة
بنات و ستات و رجالة
و عيال بتلعب فى الحوارى
و بياع السمك عاشق و بيغنى
و سيدى الاخرص اللى كلمته عمرها ما.....تتنى
رجالة زمان .....
كانوا حواديت ما فيش راجل دلؤتى يعرف يحكيها
حواديت الكلمة فيها عقد و الوعد فيها وثيقة
و مزيكا .......
يا حواديت الطفولة
عيالى هم الحدوتة اللى حكاها قلبى
و بيكملها فكرى و سهرى و خوفى عليهم
انت حدوتة بايخة لا بتخلص و لا بتحلو
انا حدوتة شايخة شابت من كتر الهم
كل اللى راحوا و كل اللى لسة جاين حواديت
و العمر نفسه حدوتة منهية
حواديت حواديت حواديت
مافيش فى جسمى حتة مافيش فيها وجع
و كل وجع فى كل حتة حدوتة