أرواح شاهدة

دقة زار وحضرة ذكر فالموالد 

وهزة عنيفة تضم قلبي الشارد

مسحور انا ..خارج من كهف الخوف 

ماشي فسرداب الضياع

أسياد كتير يهمسوا جوه مني

يغمسوا صوت الحقيقة بالخداع 

(قالو اتلبس!)

سيدك بيرطن بربري 

وم اللحظة دي 

طلقوا بخور من روح غضبانه تشبهه

متخافش من همسهم 

ترياق دا مر ..بس اشربه 

هايأمنك شرهم 

سبحتك فاليمين...و اية الكرسي فسرك تهدهم

وبين ضلوعك قل أعوذ.. 

 تنصرف الروح بطلوع الروح يجوز..!

حابس حابس..

تهز الكُدية روحي

تنفخ حلمي البسيط بنار الجان 

ولغات كتيير تسرد كلام 

ليييه خطوتي قربت من دنيت المجاذيب! 

وابتدت ملامحي تختنق من الدخان 

مش عارف ليه دايما حاسس انى غريب

والدنيا فوشي ملطمة ..

مدد يارب ..

محتاج اشوف خرم ضي..ابص منه ع الحياة 

انت الكريم...

اللي عالم باللي جوه الروح

قادر تطبطب علي كل مجروح

ياارب ..

افتحلي أبواب المرحمة 

ومد حبل وصلك للنجاة 

نجيني من ظلم نفسي.. قبل ماقابلك يوم اللُقا.