العربي ..... وحش المجموع ، و الفروع ، ده بالنسبة لباقي مواد ثانوي كان زي صالح سليم في فيلم الشموع السوداء ....و انت لو اتنطط مش هتاخد فيه مكانة روي في الفيلم !!!!
نحو ، قراءة ، تعبير ، املاء ، بلاغة ، ادب، عامة نصوووووص ، و القصة .....و مش عارف لو فيه فروع تاني و لا لا ،صراحة كنت احب التعبير ، اعشق القصة خاصة لو هادفة او ذات معني عميق ، زي قصة ابوالفوارس عنترة في اولي ثانوي.، و الرائعه وا اسلاماه في تانية ....ثم ختمت ختام يشبه حجر علي صدرك لدخولك في السلام وقت الجاهلية ، بقصة دراسة نقدية من ابشع ما درسنا عن امير الشعراء احمد شوقي ، كل شوية يقولنا ربة الشعر ، ربة الشعر ....و انا كنت بدءت اكتب شعر وقتها، و تلاقي اللي يقولي اكتب انت في الشعر ، نزل عليك الوحي و محسسنا ان ربة الشعر بتاخد درس عند ابوك !!!
المهم في اولي ثانوي و لعدم تقسيمها لعلمي و لا ادبي و لا حتي كردي ....لو قالوا بنزيون عدس و ريفولي دي مواد في اولي ثانوي اقولك وارد صراحة !!!
وورغم كل المعاناه دي ، لكن كانت هناك لمسات من كل واحد و التاني .....مثلا الشعر الجاهلي كان الاروع بالمقارنة بشعر تالته ثانوي عديم القافية و لا السجع وولا حتي الجناس التام او الناقص او حتي المنعدم !!!
....المهم
اولي ثانوي دي عالكل كانت نقطة انكفاء المنحنى ....فاكرين نتايج اختبار الذكاء ، اللي يفكرك باعلان قناة موجة كوميدي و شركة النصب لاختبار الذكاء ، من حيث ارقام النتايج اللي تفرح .....كانت نتايجنا في اولي ثانوي كلناااا تقريبا كانت ما تتخيرش،عن نفس الارقام .....تفرح تفررررح ..... تزغرد كده !!!!

ده حتي التربية الوطنية ، كنا واخدين فيها درجات ،تحسسك لو اسرائيلي حضر حقبة النكسة و حرب اكتوبر ، ليجاوب احسن مننا !!!!
.....هاكدب يعني ، ما ده اللي حصل والله في السنة دي تحديدا مع اغلبنا ان لم يكن الكل ..... يوووه ده انا نسيت انه كان مقرر عالمتفوقين ، او "الفائقين" كما كان يسمي الفصل رسميا ، يعني يحسسوك انك في مدرسة الباطنية و دول الفائقين بين باقي ال مش فايقين - كانمقرر علينا قصة انجليزي زيادة اسمها operation mister mind , ساحر و كمبيوتر مفتري و مستكشف شبه جيمس بوند و ايه مغزى القصة للان ما عارف ، ربما عشان كنا بنقارنها بالمقرر الرئيسي قصة cont of monunt cristo , اللي هي نفس قصة امير الانتقام ، و امير الدهاء في افلامنا العربي "مع بعض التحوير " .... بس مش امير البحار عشان محدش يظيط ، اه كلهم بحاره بس الدقة مطلوبة !!!!
المهم ...... حتي حصة الرسم في اولي ثانوي و امواجها المتلاطمة كانت سخيفة ..... جدول متكدس كل يوم 6 حصص ، و سبت و تلات سبعه ....و كنا مسائي ، و نطلع عالمغرب ، تحس الشمس بتاخدك بالحضن ووهي بتغرب و تقولك ....تعااالي يا حزين !!!
طبعا اولي ثانوي بتاعتنا بالمقارنة بمناهج الانجليزي حاليا في تانية ابتدائي فصاعدا الان "سواءا عادة او سوبر ، يعني حكومي او لغات " .....تحسسك فعلا ان اختبار فصل المتفوقين سابق الذكر بتاعنا ده ، كان مؤشر غباء بس خافوا علي شعور الجيل ، فالمسؤل الكريم ، بدل ما يزور نتيجة كام و اربعين طالب عشان نجبر بخاطرهم ،شيلوا كلمة غباء و دخلوهم الفصل ....و بررررضه ابقوا قابلوني ، و يبدو انه صدق !!!!
و مرت اولى ثانوي بمرارها و مرارتها ، و مرها ، رغم انه كانت مرحلة استثنائية جدا .، اذ لم نكون في فصل مشترك منذ الابتدائية الي ساعة تاريخه ، و لاجل حظنا برضه فصل المتفوقين طول عمره ما يزيدش عن عشرين طالب و ده سر تميزه...فقط ....اما بقي علي حظ حظنا ، كنا 31-طالب و طالبه ، و ده كان عدد مكدس اااااان ذاك .....هاااااا
طبعا ده بالنسبة لعدد طلاب فصول الايام دي ،كان زي حديقة الاسماك بالنسبة لاتوبيس مواصلات عامة في القاهرة الساعة 2 الضهر ، في نص الاسبوع !!!!
كفايا اولي ثانوي كده عشان سيىرتها بتعمل لي حموضه ، و كرشة نفس .....فكفاياها علي كده ، و الفصل ده كمااااان للاطلاع فقط اهه بس !!!!!