مشوارك 6
و للاجازة .....العاب !!

كرة القدم ما كانتش،اللعبة الوحيدة في مشوار اجازتنا السعيده ..... كنا نلعب من اول الاستغماية و كهربا و سببت و السيجة و السبع بلاطات و صيد الحملم ، و العاب الاوراق زي بنك الحظ و الكوتشينه و الشايب و السبعه الكومي ، و اشك و الاونو. ...وحتي ورق الايس كريم كان لعبه "ما تستغربش اصبر علي رزقك " ....لحااااد اتاري الطيران الشهير ووبعده ملك الالعاب . ..سوبر ماريو العظيم !!!!

ورق الايسكريم دي كانت بنك الحظ المحلية ، اللعبة اللي كان بيشكرنا عليها كل العاملين في البلدية ، لان بسببنا ما كانش فيه ورقة ايس كريم تترمي في الارض ، زي ما الناس كانت نتجمع طوابع و غطيان حاجه ساقعه ، كان ورق الايس كريم له حظه معانا ....مين اخترعها مش،عااااارف صراحة

بس كانت دي اللعبه الارقي من ورق الكبريت القديمه ، و كانت ثروتنا من ورق الايس كريم تحدد قيمة كل لاعب .... و طرق اقتناء هذه الثروة تختلف ، اللي زيي اللي ما لوش في اللعب ، كان يشتري الايس كريم بكميه مضاعفه عشان يقتني الورقه اكتر من اكل الايس كريم ،ممكن تعزم اخواتك علي ايس كريم فقط عشان يدوك الورقه .....و اللي بقي محترف و بيعرف يقرص بالزهر "تقاوي مقامر يعني " ده يقولك تعالي نلعب ، و ياخد كل اللي،في جيبك ، و يخليك تروح تاخد مصروف اضافي تجيب بيه ايس كريم ، عشان تقتني الورق ما تبقاش الشاب المفلس بينهم ايس كريميا !!!!
بعض العيال كانو يلعبوه بطريقه البولينج ، بس بلدي شويه ، حيث تستبدل كرة البولنج بشبشب يكون زيكو و لا اديداس كده ينساب عالبلاط او الرصيف مصيبا هدفه وسط الدائرة ....و دي ما كانت تستهوي،اغلبنا ..... سوء تنشين ..... استخسار للشبشب ، او خوفا من شبشب طايش يجيب لك شكوى و علقة انت في غنى عنها !!!!
اما الطريقة المثالية تبعا لكاتالوج مصمم اللعبه المجهول ، فهي بالزهر ، ممكن لو ما لقيتش زهر تشتري بنك الحظ ، تررررميها ، ووتاخد الزهر تلعب بيه ورق ايس كريم ،،،،، والله جيل تحفة ، هي البلد حصلها اللي حصل من قليل علي يد جيلنا العظيم !!!!

ما تستغربوش ، اللعبة كانت جذابة ،اذكر اني كان معايا 3-اتاري في البيت انواع مختلفه و شغالين ،،،، و اسيبهم و اروح التحق باحد دوائر لعب ورق الكيمو "اسم الدلع للعبة " ..ّ.و كل ورقة لها تمن مش ورقة و خلاص ، و تمنها حسب ندرتها و تمن الايس كريم نفسه ، يعني مثلا الكيمو كونو ، الحمرا بخمسين و الزرقا ب خمسه ووعشرين .....تسعيره وولا البورصه ، و تسعيرة شبه دوليه ، كله عارف السعر ، و سعر الصرف ثابت ، و لا تعويم و لا تغيير ..بس،خمسين ايه ما اعرفش عمركم شفتو برصه تتعامل بالرقم فقط دون اسم للعمله .... ما هو كله سوق سودا ،لان ابهاتنا كانوا بيعتبروا اللعبة دي بداية ع طريق القمار ....و يا ويله من يضبط متلبسا بلعب،ورق الكيمو .. ده ابويا رحمه الله كان يزعق لنا علي لعبة بنك الحظ و ما كانش يحبها ، امال لو قبض عليه و انا بالعب كيمو .... كان طبق عليه الحد !!!
....ّ.نعود لسعر الصرف و اقتصاد ورق الايس كريم المزدهر ان ذاك ، كلما كان الايس كريم شائع و اقل سعرا ، كانت ورقته كذلك ، و كلما كان نادر كان اغلي .....و يا سلام لو واحد معاه ورقة ايس كريم لزقت غلط في شنطة اخوه اللي جاي من اسكندرية و لا السويس،....او هو نفسه يروح يصيف و يسيب كل متع المصيف و يركز علي اكل الايس كريم و نوعه ، و لا مانع لو غافل اهله و لقي ورقة ايس كريم نادره عالارض فيميل ياخدها و ينال تشجيع المحيطين به لتنظيفه ارض المدينه ، و هو غافلهم و حطها في،جيبه ده بقى كان يرجع يرسم دور مدير البنك ، يسيب للمصيف و صوره و ذكرياته ، و ييجي،منتفخ الصدر و الاوداج بورقة الايس كريم اللي جبتها من الارض،يا معفن .... و يحط لها سعر زي ما يحب و يفكها كمان لو زهق منها ....يعني ممكن مثلا تفك ورقة ايس كريم كيمو كونو اللي ب 50 ، بخمس ورقات ام 10 اللي ايس كريمها وقتها بقى ايام العز كانت العلبة ب خمس عشرة قرش ، لان الربع جنيه كان تمن الشيكو ، و ده من غير ورقة ....ما فكرناش،ليه نلعب بعصاية الشيكو و الدولسي ستيك ....ليييييه مش عارف ، و انا كنت باكل منه كميات ، يعني كان زماني مدير بنك ورق الكيمو فرع الشيكو و الدولسي ستيك !!!!
كان يغيظني اكتر بقي ..... كنت احب ايس كريم اسمه "نون ستوب non stop" كانت علبته بجنيه كامل ، يعني تمن لتر بيبسي وقتها ، او تمن اتنين كيمو كونو او اربعه شيكو او خمس ست علب،كوبايات ايس كريم ، او دستة لوليتا . .... بس نون ستوب ده بفقره كان بعلبه لها غطا بلاستيك شفاف، يعني لا يخضع لقوانين اللعبه.....ما فيش ورقه ، ما فيش الوان و كلام و ماركه ..... بس برضه كنت باحبه و اجيبه ، يعني،نظام غوروا بقي بلعبتكم ....يعني يا رب لا كنت نافع في الكورة ، و لا حتي في ورق الايس كريم !!!!