بعد فرحتك بالبرجل و القلم ابو سنون اللي كان اختراع وقت ظهوره يوازي الفمتو ثانيه ، و تعدد بفضل طلاب كلية هندسة من نص ميلي ، الي تلاته من عشرة للمحترفين ، و سبعه من عشرة للي ايدهم تقيله و تسعه من عشرة ميللي لذوي الايدي المرزبة !!!
مع الجيل الحالي ، اصبحت طلبات المستلزمات ، مثل طلبات علاء الدين اول ما دعك المصباح السحري و طلع له العفربت !!!
طلبات اقرب لطلبات الدجالين منها لطلبات تلميذ لمدرسته ..... فرخ لوحة مش عارف اسمه ايه "اسم شبه المضاد الحيوي" عشان نشاط العربي ، و في الاخر برجع التلميذ مكتئب و يقولك الابله خدته حطته عالرف و لا بصت فيه ، بينما امه قربت يجي لها انزلاق غضروفي و حول مؤقت ، من كتر ما هي،سهرت بتصمم له في النشاط ، لكل مادة ، لدرجة انه ممكن يعملو نشاط لمادة النشاط او يخترعوا مادة اسمها نشاط ....او كورس في فنون النشاط .....او دليل الامهات لعبور النشاط !!!!

طبعا من ضمن ابطال المستلزمات و رفيق مشوارك ، اللي انت بتقضي،بيه المشوار فعليا ، هو الحذاء المدرسي، و اللي بدوره تطور من حذاء جلد سادة برباط او بدون ....مرورا بظهور الكوتشي،سواءا بقي اديداس ، لوتو ، ثم ظهور طفرة اميجو "و هي معناها صديق بالمناسبة اعتقد بالاسبانيةعلي ما اذكر " و ده بيدي اشارة الي ان كلمة صديقك فلان ده ما تقلعهوش من رجلك قدتحمل عدة معاني ، اما انه متين و اصيل و حميم زي كوتشي اميجو .....او انه زي الكوتشي السكه اللي اتقطع منك في اول حصة العاب و خلاك اتهمت زورا و بهتانا انك قطعته عشان بتشوت ظلط في الشارع !!!
مع انك مش برىء قوي يعني لو ضغطت علي ذاكرتك شوية !!!!
اميجو في التسعينات كان طفرة ليه ....لانه مرة طلع لنا بالكوتشي اللي بينور .....كنت تمشي في الشارع تتروش ما بين اشارات العربيات و نور الكوتشيات .... اعتقد لو استمر اكتر كان هيتعمل شرطة تنظيم الكوتشيات و يتعمل له ترخيص و مخالفة سير عكس الاتجاه !!!!
ثم اصبح احترافيا باضافة البوصلة للاميجو ، و حسسنا ان العيل رايح يفجر بيت شيفع و بات يام في مدرسته فما يعرفش يوصل من غير البوصلة !!!

* يوم الامتحان .... يهان المرء او يهان

ليه يهان او يهان ..... لان يكرم دي تشوفها باذن الله لماااا تطلع النتيجه و تكون مرضية و ده بيتوقف علي سقف طموح اهلك ، يعني ممكن تلاقي زغاريد و شربات واحد لانه نجح في الاعدادية من غير ملاحق ، بينما ممكن تلاقي بيت مجنز و معلن الحداد و رافع قضايا و تظلمات علي درجة نقصها الولد في التعبير في الابتدائية ، و كانها الدرجة اللي غيرت مسار حياته من العمل بوكالة ناسا ، لسايس عربيات مثلا !!!!
و يوم الامتحان ده او موسم الامتحان ده كان بمثابة عيد استثنائي،يجمع بين مزيج غريب من الاكرام و الاهانة المعنوية ..... اولا ده كان موسم البنات انهم يلبسوا فساتين العيد المتخزنة من ايام سبوعهم و يتخلصوا من لبس مريلة المدرسة او الزي المدرسي عامة لمدة كام يوم ، و بدل ما كلهم ما بيبقو شبه بعض،لا تفرقهم الا بالتوكة و النضارة للي بتلبس،نضارة ، بيتحولوا بقي في الامتحانات الي بطلات افلام الكارتون بموسم الوان بيض شم النسيم اللي بيطلعوا بيه وقت الامتحانات في هدومهم !!!

و موسم الامتحانات في مشوارنا كان يعني بعض الشعارات ....اولها كارتونة النتيجة اللي بتسند عليها في الامتحان عشان ورقة الامتحانات ما تتخرمش من اثار الدرج اللي بقي شبه مطبات الطريق الزراعي من كتر حفر سن البرجل فيه و فن النحت التشكيلي اللي كان بيمارسه اغلب التلاميذ ،!!!
كارتونة النتيجة دي،كانت غالبا فيها اشارة ما .... لو عمك و لا والد و لا خالك و حد من العائلة بيبحبك و امدكم بتلك النتيجة مدير بنك تلاقي شعار بنكه منور علي خلفية بيضا ....و لو دكتور تلاقيها اما دعاية مركز اشعه او معمل تحاليل .....او بقي نتيجه و السلام المهم يكون احد اسطحها لازال يتمتع ببعض النعومه !!!
تلاقيها مثلا دايما نتيجه تقويم السنة اللي فاتت ، لانه استحااااله هيرضوا يضحوا بنتيجة تقويم السنة دي،عشان امتحان جنابك ، فبتحافظ علي لوح النتيجة ده اكتر من حفاظك علي اي، من المستلزمات المدرسية سابقة الذكر ، كانها يعني كلها ما كانتش،ب تلاته جنيه و انت بتصرف قدهم عشرميت مرة !!!
تلاقي النتيجه عليها لمسه من لمسات التلميذ او الطالب ..... اسمه و رقم جلوسه ، للملتزم ، اسمه و رقم جلوسه و اول حرف من اسم زميلته اللي معجب،بيها... لو محترم
اسمه و اسمها ،لو بادىء سكة انحراف جزئي او عايش الدور ، او رقم تليفونها لو كان منحرف فعليا !!!

طبعاااا استحاله يكتب اسمه او رقم جلوسه او حتي بصماته عالنتيجيه ....لو ناااوي عالشر .....يعني هيغش !!!
تلاقي ان وش النتيجه اللي هو مصدره ابييييييض،و ضهرها بقي و لا حجر رشيد من اللي مبرشمه عليها ، و كل مادة لها ركن ، او لها نتيجه مستقله !!!!