انتِ مش زي حد .. " الفردانية مش بصمة أيد !! دي بصمة روح"

اتباع القواعد أمر مهم داخل المؤسسات و أماكن العمل المبنية على وضع أسس مسبقة للمعاملات المختلفة .

هل ينفع أغير المسار بحجة إني مختلف ؟ أظن لأ !! احنا نختار ساعتها المناسب مع قدرتنا البدنية والنفسية و نغير فى المتاح .

 ---

انتِ مش زي حد . في رحلة الحياة بنتعرف على أجزاء مننا ونسعى للتعلم وتطوير المهارات اللى بنكتشف إنها بتميزنا. المغزى من ده إننا ننفتح على الحياة وطرق التعامل الرحبة المتعددة واحترام اللى أقدر أقدمه . 

بما إن رحلتنا هدفها التربية لنا و من بعدها الأبناء، يبقى مهم نطرح الأسئلة ونطلع من جوانا الاجابات ...

* كم مرة حسيتي بالغيرة لما شوفتي أم بتسابق أولادها مثلا و بتتفاعل معاهم بالحركة و انتِ مش قادرة تعملي ده ؟

* كم مرة حسيتي بالاحباط لما جالك ابنك عشان ترسمي معاه ورفضتي لإنك مش بتعرفي ؟

* كم شعور ؟وكم فكرة ؟ عززت عندك إحساس إن اللي بتقدميه مش كفاية ؟

* هل فكرتى تعكسي الأسئلة وتخليها إيه اللى أنا شاطرة في تقديمه لابنى ؟ 

أوقات بنبص علي المهارات اللي غيرنا بيقدمها لأولاده و نغفل عن اللي بنقدمه، و نعتقد انها حاجات مُسَلَّم بيها و في منتهى العادية، لكن حقيقة الأمر هي حاجات غاية في الأهمية، لأنها طالعة من جوانا ببصمة روحنا واحنا ملتفتين عنها برؤية مزايا غيرنا ومواطن قوتهم. 

لما بنجاوب على الاسئلة بيظهر معانا بوضوح تميزنا وبنعرف مواطن القوة عندنا من غير ما ندخل نفسنا في مقارنات غير عادلة.

الأفضل دايما اننا نختار نستمتع باللى يميزنا ونتعلم عنه و نشاركه بوضوح مع غيرنا، ساعتها اضمنلك تشوفي مواطن القوة اللي عند ابنك بدون مايفقد بصمة روحه و يتعزز عنده مفهوم الاختلاف و إن هو كمان مش زى أي حد .