عدت سنوات كتير على وفاة أبى..

مش عارفه ازاي عدوا ...بس عدوا

 فاكرة اليوم ده كأنه امبارح...

 ربنا بيدينا الصبر و القوة اننا نكمل حياتنا....و بعدين نقبل غياب أعز ما لنا 

  بنتعود على فكرة انهم صحيح مش موجودين معانا باجسامهم لكن موجودين بارواحهم و افعالهم و سيرتهم الطيبه و ذكرياتنا معاهم 

وبنفضل نود كل حبيب لهم

و يودونا

...الى ان نلقى الاحبة

 الصدفة 

كنت ف طريقى لزيارة اخواتى مع ابنتى وزوجها ومرينا ف طريق غير الطريق

وقفت العربيه لان الطريق غير ممهد وقفت 

بالصدفه

اغرب واجمل صدفه

 امام قبر أبى

 امام مقابر عائلتنا...

مش عارفه نزلت ازاى مش كنت عارفه اتحرك اتجمدت عروقى واعصابى مش كنت متوقعه الزيارة

عدت قدام عينى كل لحظات حياتنا كان

 كاريزما لم يتكرر

عاش حياته كما يكون وتقلد كل المناصب

كان جميلا قلبا وقالبا

وصلت للقبور ابحث عن اسم ابى عن المقبرة 

ولكن وجدت رخامه مكتوب عليها اسم ابن عمى الشاب الجميل الصغير الذى توفى ف كورونا كان صديقى وكل ما ادخل نت الاقيه بيكلمنى ويسأل عنى ونفضل نحكى كتير ونضحك 

ما زالت محتفظه بالحوار الذى كان بيننا كتير ادخل اقراه وابكى

نسيت انى نازله لقبر بابا 

افتكرت احمد

وضحكته وكلامه 

واماله بكيت وعيونى على اسمه المكتوب على الرخامه لم احضر جنازته واول مرة اشوف مكانه هنا وسط الاموات

ف المقبرة عماتى واهلى ولكن اسم احمد وجعنى 

مش عارفه جيت ازاى والا ليه ولا كنت مهيئة للحظه دى

قرأت لهم الفاتحة وكل السور الصغيرة التى احفظها

ودعيت لهم ولكل اموات المسلمين

اتألمت 

تعبت نفسيا

ورجعت للعربية

ورجعنا للطريق الاخر الممهد

ووصلت عند اخواتى وجوايا 

احساس صعب

كتير رحت عند اخواتى بعد وفاه بابا لكن المرة دى بقى عينى على كل مكان وقف فيه وكل مكان مشى فيه وكل طوبة ف البيت فكرتنى بيه

سألتهم فين الرخامه اللى على قبر بابا قالت لى بنت اخويا انها وقعت ووضعوها فوق القبر 

طلبت من اخواتى يلصقوها مكانها

عندى والحمدلله اجمل اخوات ف الدنيا

ربنا يخليهم ليا ويبارك لى ف عمرهم

مقابلتهم واولادهم وزوجاتهم مقابلة

جميله

من نعم ربنا علينا

رجعت بيتى متعبه ونمت شفت بابا ف المنام وانا داخله البيت زى

 القمر 

 باسلم عليه و عاوزه ابوس ايديه ولكنه شدنى بفرحه جامده واخذنى ف حضنه جامد اوووى

حضن عمره ما حصل ف الحقيقه 

الاموات بيحسوا بينا اكيد

اول مرة كنت ازوره من يوم وفاته وكان زيارة صدفه دخلنا ف طريق غير الطريق

ولا كان يخطر ببالى

...ممكن تكون الحياه هناك اجمل كتير من هنا سبقونا

 وربنا يجمعنا بيهم

و

 يحسن خاتمتنا