على مين يا سيد العارفين،،،،، الرجل المصري بسلامته، حدش شاف شاب اسمر دمه خفيف؟؟

في رحلتي مع الاصوات الغنائية اتكعبلت في درر محدش يعرف عنها حاجة، وأنا أصلا لا لي في الغناء ولا التلحين، أنا مجرد سميعة، عايشة أسمع واتأمل عظمة ربنا ف خلقه،

مرة زمان جدا وأنا صغيرة جدتي كانت بتسمع أغنية غريبة بتقول دور دور دور لف الدنيا بحالها لو هتدوب فجمالها راح ترجع هنا.

الصوت مبحوح بحة غريبة جدااا، دافىء انثوي مصري دلوع، صوت عجيب مفيش منه، لون لوحده، دي كانت بداية معرفتي بالست شريفة فاضل.

ست عبارة عن كوكتيل متناقضات، ست جميلة صوتها جميل تزوجت فنانا ضخما شكلا وموضوعا هو السيد بدير وانجبت منه شاب اشتغل طيار استشهد ف ٧٣ وغنت له اغنية شهيرة جدا اسمها ام البطل.

بعدها افتتحت ملهى ليلي بشارع الهرم سمته (كازينو الليل) نسبة لاغنيتها الرهيبة الليل موال العشاق !!

ليها بقى شوية اغاني انما ايه تشيب، كسروا الدنيا ستينيات القرن الماضي منها اغنية انا لازم اسمعها تلات اربع مرات ورا بعض الاغنية بتقول

 فلاح كان داير بيغني من جنب السور شافني وانا باقطف كام وردة ف طبق بنور قطع الموال وضحك لي وقال يا صباح الخير ياهل البندر، يا صباح النور

ثم تنادي شريفة بصوتها المبحوح على جمهورها قائلة،، ياهل الله،، ويرد السميعة بجنون اييييييه،،،، فترد بدلع: حدش شاف شاب اسمر دمه خفيف له خطوة جريئة يمشي بشهامة اهل الريف،

الاغنية دي عملت حالة رهيبة ف الوطن العربي كله رغم محليتها وكلامها عن فلاحين مصر. اغنية تشوفها فخيالك وانت بتسمعها، شكل الفلاح المصري الحليوة، سماره، طوله، رجولته، وقفة البنت ف جنينة بيتهم، حاجة وهمية،

ليها بقى اغنية تانية دي اعجاز الاعجاز ولحد دلوقت مكسرة الدنيا والعيال الصغيرة بناتي فاكرينها اغنية محمد منير وهي اصلا اغنية الست شريفة فاضل بتقول ايه الاغنية بتقول

 على مين على مين على مين على مين يا سيد العارفين ان كنت نسيت روح اسال قبلا انا مين متروحش تببع المية ف حارة السقايبن

الست شريفة كانت مثال للبنت المصرية الواعية اللي عاوزة راجل دوغري مش بتاع حوارات وبيجيب من الاخر ويبدو ان الحوارات واللف والدوران كانوا متلازمة زي متلازمة داون كده للرجل المصري الاصيل من سنين طويلة غابرة وان الحواديت والاسطوانات ثقافة ضاربة في جذور الرجل المصري المعروف بجبروته????????????

 لكن الست شريفة بكل جدعنة قالت له، اتعدل معايا وخليك دوغري ومتشغلش اسطوانات حب وغرام وتسالي.

بالظبط زي الست شادية لما قالت له يا تشوف لك حل ف حكايتنا يا تعزل وتسيب حتتنا مش ناقصين خايلة كدابة وتشاور لي واشاور لك، انجز يابن الحلال، وتروح لابويا ونلم الليلة.

فعلى ما يبدو ان الموضوع كان معروف والبنت المصرية طول عمرها بتسمع ومطنشة، صبرها قليل وخلقها ضيق وفاهمة تكنيك اللف والدوران اللي بينزل مع الراجل المصري اساسي مش اوبشن، وممشية حالها ابن بلدها برضه وله ميزاته التي لا ننكرها.

ما علينا الست شريفة فاضل توفيت النهاردة، رحمات الله عليها وغفرانه يتغمدها.

كانت فنانة جميلة رغم قلة أعمالها ولون لوحدها، لون شعبي جميل دلوع وذوق وراقي رغم انها بنت بلد من اللي قلبك يحبها، 

 مفيش اللون ده دلوقت للأسف كله اسفاف، ياللا ربنا يرحم الست شريفة ويرحمنا وانا لله وانا اليه راجعون..

دينا عاصم 

دينا سعيد عاصم