وأنا بكبر

نسيت جوايا مشاية

وفردة من الحلق واقعة

نسيت أتعلم اتكلم

وفي التسنين نسيت سِنة

وأنا بكتب

بريت قلمي من الأول

مليت دفتر بأحلامي

وأبلة اسمها ليلى

إيديها معلمة لسة

على كفي

وأنا بكتب

وفجأة أو بدون إنذار

لقيت الدفعة بتعجز

وانا بحبي من الأول

وودني من الدهب فاضية

وكل كلامي متكسّر

محدش عاد بيفهمني

كأن حروفي كات تايهة

بقيت بسكت

بقيت بضحك ... عشان مبكيش

بقيت بجري

عشان محبيش

وبكتب بس برمي كتير

لقيت قلبي كمان ساكت

وإيدي في حاجة مبتمسكش

لكن روحي بتهوى كتير

ولسة الدنيا في عنيا مخلصتشي

وبحلم بكرة هطلع ايه

وأنا بكبر