لازم تعرف
العلاقات الإنسانية زي البنج بونج، تقوم على تبادل المنفعة، المنفعة مش المصلحة يعني لازم أي علاقة تغذي عندك شيء معين سواء كانت علاقتك بأسرتك الصغيرة الوالدين والإخوات أو الأسرة التانية زي الزوجين والأولاد أو علاقة الصداقة او زمالة العمل
حفاظك على استمرار العلاقات دي بيكون له سبب وأكيد السبب متعلق بحاجة جواك.
والمنفعة دي ممكن تكون فلوس ودي اقل أنواع النفع اللي ممكن تعود علينا زي علاقة الابن بابوه فهو لما يزعل منه يقوله هقطع عنك المصروف لكن ميقدرش يقطع المنفعة بالشكل الكامل يعني مثلا ميقدرش يقوله مش هصرف عليك او ملكش عشاء انهاردة أو أنا مش أبوك ولا أعرفك.
لما بنكبر شوية بنعلا ونشوف علاقات المنفعة الإنسانية
الصديق بيغذي عندك الإحساس بالحرية والبهجة.
والزوج او الزوجة بيغذوا إحساسك بإنك شخض مرغوب فيه.
حتى لو كنت أنت اللي بتفيد الطرف الآخر فهو بيرضي عندك إحساسك بأهميتك.
زي لما تساهم في تلبية طلبات أهلك لما يكبروا
ما يبدو في الظاهر ان في طرف بيدي وطرف فقد القدرة على العطاء لكن الحقيقة ان لكل فعل رد فعل ومفيش حاجة بتمشي بدون دافع حتى لو كان الدافع خفي أو غير محدد فهو مفهوم ومحسوس عند أطراف العلاقة
مع مرور العمر أحيانا ناس كتير مننا بتفقد الدافع
يعني تلاقي صديقك بطل يسمع مشاكلك، أو حسيت أنه بيسمعك أداء واجب.
أو حسسك إن وجودك مش فارق
أو الزوجين حصل بينهم زهد أو فتور، أو فرقوا عن بعض سواء ماديا أو وضعهم في الشغل اختلف بشكل واضح، أو الزوجة مثلا حصلت على دكتوراة وزوجها بكالوريوس عادي.
وساعتها لو فقدنا أي دافع يمشي العلاقة في الطريق الصحيح
ساعتها بيكون الاستغناء سهل ومش فارق، ويبدأ الإنسان يدور على دافع في حاجة تانية تغذي عنده الكائن اللي جواه
وساعتها بيتخبط لأنه مبقاش يدور على الشخص بقى يدور على دافع لأنه يكمل ويدور على السعادة.
فتلاقي زميلك في المكتب وعشرة عمرك مثلا بيشوف مصلحته بعيد عنك
أو صديقك الانتيم مبقاش يرد عليك ومبيطلبش يشوفك.
تلاقي عينك زاغت لواحدة تانية بعيد عن زوجتك.
أو إنك اتعودت أن اهلك مقدرين ظروفك وبيلتمسوا لك الأعذار في إنك مش بتزورهم.
وده طبعا اول مسمار في نعش العلاقات المهمة.
وساعتها تلاقي نفسك داخل في دور الضحية، والعمر عدى ولا لمحته، ابقوا افتكروني لو سمحتوا
ويتملكك شعور انك ضيعت عمرك عشان الناس وخانة العشرات بقت ٤ ويمكن ٥ وانت مش فاهم ايه اللي بيحصل
طب ما تستنى كدة
أنت فاهم إيه اللي بيحصل ؟
أنت زودتها قوي ومفكرتش هو انت بتدي على اد ما بتاخد ولا في كفة راجحة عن التانية ؟
لو اكتشفت ده لازم تقف وتتراجع وبالتدريج وازن الأمور واضبط علاقاتك بالعقل
افهموا علاقاتكم بالآخرين، متظلموش الطرف الآخر انتوا بتستفيدوا منه وإلا مكانش في قوة في الأرض تخلينا نكمل
حافظوا على بعضكم أو امشوا في سلام
2
-2
