الرجل .. للحب جائع

 ليه الراجل التقليدي دايماً جعان حب 

مع انه بيختار بكامل إرادته يكون زي الباقيين و يقولك بتعلم من تجارب الآخرين

الحقيقة إن مفيش حاجة إسمها أتعلم من تجارب الآخرين 

لأن لو هتتعلم من تجارب الآخرين فا زي ما في آخرين تجاربهم أدت الى ١ ، ٢ ، ٣ 

نفس التجارب دي خاضها آخرين غيرهم و تجاربهم أدت إلى ٣، ٢، ١ 

لذلك انت شخص تقليدي 

لأنك بتقلد و خلاص، بدون فهم للمخزى الحقيقي وراء التجربة 

بدون ما تعيشها و تآخد خبرتها الحقيقية 

بدون أي نوع من الريسك، الإنفتاح، الوهن و الضعف، الفشل و الخسارة 

انت بتقلد خوف من التجربة نفسها، فبتختار إختيارات تقليدية تعيش فيها بشكل سطحي قافل على قلبك و عقلك و مراوحك و مدفي صدرك بجرايد

—————

مثلاً إبني و هو شايفني و انا بعمل أكلة معينة هيقلدني في عمايلها بس مش هتطلع بنفس الطعم لأنه مش فاهم مطبخ، 

مش فاهم ايه اللي عملته أنا و طلع الأكلة حلوة في حين انه مشي على نفس الخطوات " اللي شايفها مني " 

مخدش باله انا وطيت الفرن إمتى و ليه   

 مخدش باله من نص معلقة السمنة اللي اتحطت قلبت الدنيا

مفهمش ان التقليب في الوقت ده هيمنع التلزيق و التعجين 

و اني لو زودت تقليب زيادة عن اللزوم بردو هتعجن

مفهمش ليه التقليب في الأكلة دي ضروري و في الأكلة دي مينفعش خالص 

 معرفش درجة الحرارة بتبدأ على كام و امتى بغيرها و امتى افتح فوق بس و امتى تحت بس و امتى الاتنين

الخ الخ 

و عشان يعرف كل الحجات دي لازم يدخل المطبخ و يبوظ كام أكله و يتلسع كام لسعة و يبوظ كام حلة و صينية و يكسرله كام كوباية لحد ما يفهم ميكانيزم الطبيخ … و رغم كل ده مبقاش شيف ولا حاجة ده يا دوب بقى بيعرف يطبخ مش أكتر ! 

 ————

ليه بقى لما ده إختيارك بيكون عندك تطلعات لإنك توصل لحاجة أعمق في الحياة دي ؟ ! 

و إزاي هتوصل للأعمق بدون ما تتألم ! 

شرط أساسي للتنوير هو إنك تمر بمراحل ألم كتير عشان تتنزه عن كل ما له علاقة بجسدك المادي و آداءه السطحي، فتوصل لمراحل وعي مختلفة عن القطيع و تحس بنفسك الحقيقية و تفتح مراحل متقدمة من المشاعر و الأفكار و الروحانيات، و لما ده بيحصل بتتنقل من كونك مجرد شخص تقليدي سطحي بتتكلم عن التجارب بشكل نظري عايش في وعي مادي بحت، لإنك تكون كما خلقك الله و ميزك عن باقي مخلوقاته.