في يوم من الأيام روحت لمبتهل مشهور جدا علشان يجي يحيي فرح أخويا واتفقت معاه وبلغته بموعد الفرح وحبيت ادفعله عربون فقلي مش محتاج عربون وأنا خلاص جاي 

المهم قبل الفرح بيوم كلمته في التليفون علشان أأكد عليه

لقيته بيقولي أنا مش جاي علشان جتلي دعوة من ملك المغرب !!! فقولتله يا مولانا أحنا متفقين وأنا رتبت نفسي ومفيش وقت خلاص! فرد عليا بكل قلة أدب واستخفاف وعجرفة أنت عبيط يا بني بقولك جتلي دعوه من ملك المغرب هسيب الدعوه دي وجيلك أنته فقولتله أيوه تجيلي أنا لأني متفق معاك ومينفعش ترجع في كلامك فقفل السكة في وشي وكانت دي آخر علاقتي بهذا الشخص الله يرحمه

أنا بحكي القصة دي علشان أنا شخص عمري ما هعمل زي الشيخ ده وعمري ما هجري ورا الفلوس أو ورا الشهرة

ومحترمش مواعيد الناس 

من فترة فوجئت بمذيع منزل صورتي وبيعلن عن تواجدي معاه في حلقة من حلقات برنامجه 

ولقيته ببكلمني وبيقولي أنا في انتظارك بكره فقولتله مفيش حد تواصل معايا ولا عندي أي خبر

فقالي أزاي دي معدة البرنامج فهمتني أنها اتفقت مع حضرتك

فقولتله محصلش

فلقيت المعدة بتبعتلي على الواتس اب وبتقولي معلش أنا من الصبح بحاول أكلمك ولكن تليفونك كان غير متاح والوقت أتأخر وكان لازم نعلن عن الحلقة بتاعت بكره !

فقولتلها انا عندي بكرا مواعيد ومستحيل أعتذر عنها

فأزاي بقه اعمل كده وأنا كده بقه بقيت مغرور وشفت نفسي 

علشان أنا بحترم مواعيد الناس ومش عاوز اعتذر بقيت مغرور ووحش والناس تتقمص ؟! 

أنا لا أقبل إن حد ميحترمش مواعيده معايا وبعرف العذر القهري الحقيقي من العذر المصطنع

فأنت تلغي معاد معايا وتقولي عذر أهبل هقولك تمام ولكن هعلم عليك للأبد ومش هيكون ليك مكان عندي 

زي ما أنا بحترم مواعيدك وبرفض أي موعد بيتعارض مع معادك أنا منتظر منك نفس المعاملة ولو محصلش يبقى متزعلش مني .