غالبا في روسيا العريس والعروسة بيعرفوا بعض من الكلية أو الشغل، وبيقرروا الزواج بنفسهم بدون ما يقولوا لعائلاتهم، بيروحوا مبنى الزواج الحكومي ويقدموا طلب قبلها بشهر بنفسهم..

 

لما الحكومة توافق بيقولوا للاهل على الميعاد.. ده بيسبب إن حالات كتير الاهل مش بيوافقوا وبيحصل مشاكل.. الجواز بيتم الأول في المبنى الحكومي في الصباح. .العائلتين بيجتمعوا في صالة مخصصة، كل عائلة بتقعد في جنب، والعريس والعروسة بيمضوا على العقد، مفيش اي طلبات بتطلبها العروسة من العريس، غالبا بيكونوا اشتروا دبلتين ذهب، وبيلبسوها لبعض في المبنى الحكومي.. وساعات بيكون فيه عزف بسيط على الكمان..

 

بعد كده العائلتين بيعملوا فرح بالليل في البيت أو مطعم علشان بجمعوا فلوس تأثيث البيت، غالبا المكان بيكون فيه 2 ترابيزة كبيرة للعائليتين، ولازم يكون فيه مذيع معاه مايك بسماعات، مذيع متخصص لعمل حفلة الزفاف، بيعرف العائلتين على بعض، بيعمل معاهم حوار جميل وظريف ومضحك طول الوقت.. بيسئل العروسين عن ذكرياتهم وماضيهم.. بينظم مسابقات والعاب فيها فلوس لصالح العروسين.. زي مثلا ممكن يتعمل مزاد يبيع فيه طرحة العروسة أو تورتة العروسة، والعائلتين بيكونوا متعودين على العادة دي علشان يساعدوا العروسين، وممكن العروسين يجمعوا فلوس بطريقة مشهورة في برطمان.. غالبا الخال والعم بيدفع حوالي 1000 دولار، والاصدقاء والجيران كمان بيدفعوا.. ساعات العروسة والعريس بيطلبوا فلوس لحاجة معينة زي مثلا الشوك والمعالق ال هياكلوا بيها، فعلطول المعازيم يتبرعوا.. في بعض حالات الفرح الليلي بيكون يومين علشان روسيا كبيرة والتنقل بياخد ايام في القطار.. فالعروسة والعريس بيلبسوا لبس مختلف كل ليلة بس الليلة الاول بيكون فيها اجمل لبس..

 

بوكيه ورد ال العروسة بتشيله في ايدها العريس لازم يشتريه.. اي حد بيبارك للعروسة لازم يقدم وردة طبيعية غالية.. مش مقبول اي ورد صناعي..

 

في حالات كتير العروسين بيتجوزوا في بيت عائلة العريس او العروسة لغاية ما يجهزوا شقة.. الشقة غالبا بتكون 50:60 متر ولو كبيرة بتكون 90 متر.. بيشتري العروسين الاجهزة المهمة وغرفة النوم في البداية..

 

صورة زواجي آخر صورة.. لما اتجوزت زوجي المصري ما طلبتش اي طلبات، رفضت الفرح الشرقي، ورفضت تجهيز الشقة بالكامل، أثثتها بالتدريج بعد الزواج. كل شوية كنا بننزل نشتري حاجة مع بعض واحنا مبسوطين، كل حاجة في البيت لها ذكرى جميلة عندي.. الحمد لله مبسوطه أوي مع عائلتي ومعاكم في مصر بعد 17 سنة فيها.. بحب عائلتي وبحبكم وبحب مصر ومش هسيبها أبدا إن شاء الله.. ❤️