افـرحـوا بالنهايــات يا جماعــة ..

 ــ نفرح بالنهايات إزاي 😔 ؟

= لو اتعودنا نبص لڪل حاجة سلبية بتحصل لنا من منظور إيجابي ، هنقدر نتعافى بسرعة ..

دة محتاج تمرين ، ومحتاج انك تغير نظرتك للحياة ومفاهيم ڪتير عندك .. 

ربنا قَـدّر ان علاقتك بشخص تنتهي وانتهت بالفعل ، نعمل ايه عشان نتعافى بسرعة من ألم الفراق ؟

أولا : فڪر إنك عملت المستحيل عشان تحافظ على العلاقة والطرف التاني للأسف ماعملش أي حاجة ! مش فاهمك ، أو مش عارف يتعامل معاك ، أو غامض ومتقلب وڪل يوم بحال ، أو شخص حاطك على الهامش ومفيش أي أفعال تدل أنه متمسك بيك بجد ، أو شخص مش بيحترم حدودك الشخصية ، أو مستهتر باحتياجاتك وحقوقك الواجبة عليه ، أو ... أو ....

طول الوقت انت مُستهلك نفسياً في شرح و تبرير وتفڪير ، أو حزن و بكاء وهموم .. اتغيرت وأصبحت طول الوقت حاسس انك مش لاقي نفسك في العلاقة دي .. هنا لازم تدرك إنك ڪنت في علاقة مرهقة وقد تڪون مؤذية ، والإدراك نصف العلاج ..

ثانياً : اطرح على نفسك الأسئلة دي :

هل علاقة زي دي ڪانت تستحق انها تستمر ؟

لو ڪانت استمرت ، تفتڪر ڪان شڪل حياتك بعد ٣ سنين مثلا ڪان هيبقى ازاي ؟

هل الطرف التاني يستاهل إنك تعاني ڪل المعاناة دي بسببه ؟

هل هو مقدر وجودك في حياته ؟

هل هو حاسس بيك وبمشاعرك أصلا ؟

هل العلاقات الناجحة بتنتهي ؟

تفتڪر لو هو فعلا ڪان بيحبك مش ڪان هيتغير ويحاول ڪتير علشانك وعلشان يحافظ عليك ؟

ثانيا : اتنفس بعمق و قول الحمد لله ..

ـ الحمد لله لأنه أڪيد عارف الخير ليك وعالم بحالك وإيه الأصلح لك ..

ـ الحمد لله انك لسة بخير وإن ربنا حماك من علاقة مؤذية لو ڪنت ڪملت فيها ڪنت هتتعب أڪتر ..

ـ الحمد لله لأنك تستاهل الأحسن ، تستاهل الحب والتقدير .. تستاهل تعيش سعيد ..

ـ افتڪر ان ڪل أمر مُقدّر له حڪمة ، وسواء فهمت الحكمة او لا فلازم تؤمن بيها وتقول تاني «الحمد لله »

ثالثاً : افهم ذاتك ، نظم أفڪارك ، حدد أهدافك .

و دي هاشرحها في بوست منفصل ...

#انتظروني ♥

ملحوظة : ڪلامي هنا للعلاقات اللي انتهت بالفعل ، مش للعلاقات اللي لسة مستمرة و قائمة ..

أنا دايما مع محاولات الترميم و الاصلاح لآخر نفس خصوصاً في حالات الزواج ووجود أطفال ...

ربنا يصلح حال بيوت المسلمين ، ويجعلنا قدوة صالحة لأولادنا و ينبتهم نباتا حسنا ..