كان نايم على عتبة محل كبير في مدخل طلعت حرب الساعة ٣ العصر.. عنده ١٢ سنة تقريبا.. جنبه علبتين مناديل ملحقش يبيعهم قبل ما ينام أو قبل ما عينيه تقفل غصب عنه بمعنى أدق.. جنبه على بعد ٣ خطوات راجل كبير ضخم واضح إنه بيتحرك بصعوبة.. بيبع مناديل برضو وينادي عالرايح والجاي ..
أنا لحد ما جت الساعة ٣ دي كان في شنطتي ٣ غلب مناديل غير اللي خارجة بيها م البيت.. عديت عالراجل الأول وبعده محمود لإني كنت خلصت مشواري في الشارع الحبيب وطالعة على عبد المنعم رياض عشان أرجع لمستقري الصاخب في الهرم.. كنت وأنا داخلة الشارع قبل ساعتين تقريبا اشتريت باكوين بسكوت بالفراولة لإني كنت جعانة وتصورت إني هاكلهم الاتنين.. لكن اللي حصل إني أكلت واحد بالعافية وخليت التاني قولت آكله في البيت لما أروح .. بحس بسعادة من نوع خاص لما آكل بسكوت الشارع وأنا قاعدة في البيت.. بحس إني هزمت الخوف.. مش عارفة إيه العلاقة بس دا اللي بحسه فعلا..
المهم.. فضل معايا باكو البسكوت التاني.. لما لمحت محمود نايم جه على بالي أشتري منه مناديل.. لا أديله جنيه وخلاص.. بس دا نايم خالص.. شكله جميل جدا رغم إنه مفرهد م الحر وواضح إنه منامش كويس بقاله كتير.. وقفت جنبه مش عارفة أعمل ايه.. لقيت الراجل بيقولي المناديل اهي يا ست اتفضلي..
بصيت لمحمود وطبطبت على راسه بالراحة، صحي في ثواني.. حد ينام في الشارع كدا.. إنت معاك مناديل غير العلبتين دول؟ كان مطمن وابتسم كدا اللي هو عايزة إيه في يومك انا عارفكم يا بتوع الفيسبوك.. قولت له قوم طيب قولي اسمك إيه .. قام وقف جنبي زي العصفورة النشيطة.. قاللي اسمي محمود، ودي كانت اللحظة اللي عرفت فيها اسمه.. وأنا بصحيه الراجل نده له قال له قوم ياااد انت يالا بصوت جهوري لو كان استخدمه في بيع المناديل كان زمانه خلص م الصبح.. قولت له فيه ايه ما بالراحة عالواد.. إنت بتطلع فيه غلبك؟ راح ساكت وطلع نفسه م المشهد في ثانية..
محمود إنت كلت؟ قاللي هاكل اهو.. أنا أصلا أول ما شوفته حسيت إن بسكوت الفراولة شبهه جدا.. ودا اللي خلاني أصحيه عشان اتأكد انه هياكله.. لو سيبته جنبه ماضمنش يحصل ايه .. إديته البسكوت خده وبص لي اللي هو ماشي تمام.. قولت له تيجي نتمشى شوية.. تشرب بيبسي مع البسكوت؟ قاللي ماشي..
خدنا الزاوية وطلعنا عالممر الطويل اللي فيه بازارات وأكشاك صغيرة حلوة جنب بعض.. طلعت ٥ جنيه ووقفنا عند أول كشك فيه بيبسي، البياع قاللي عايزة إيه يا أبلة .. كان محمود ساعتها كتفه تحت دراعي، وكنت عرفت منه في المسافة اللي مشيناها إن الناس بتغلس عليه وإن البيع مش قد كدا.. ففهمته إن إحنا كمان غلبانين زيه بس دا لبس الشغل بتاعنا.. قالي أيوا ما أنا عارف، وكان بيضحك ضحكة هادية زي كريم عبد العزيز وهو صغير وحلو كدا..
كنا في مدخل الكشك، خليته يشتري هو البيبسي واديته الخمسة جنيه في إيده يدفعها للراجل بنفسه.. الراجل مش عاجبه، اللي هو يعني خلصونا بقى.. قلت له تاخد إيه يا محمود فيه سفن أب وميريندا وبيبسي.. قاللي بيبسي، قولت له طيب يا حبيبي اختار اللي يعجبك الرف قدامك أهو .. إيده راحت لرف تاني فيه أزايز سفن أب ولمون.. مكانش عارف البيبسي م الميرندا البرتقان من السفن أب.. شاورت له عالكان.. أهي يا محمود الزرقا دي.. سحبها وادى للراجل الفلوس وطلعنا سوا م الكشك..
وقفنا سوا لحظة قدام الكشك.. افتح البسكوت يالله يا محمود واشرب معاه البيبسي.. اشربه كله يا محمود وكُل البسكوت كله.. متديش حد حاجة.. خلصهم انت دلوقتي..
حاضر..
وكان بيبتسم نفس ابتسامة كريم..
رجع هو لمدخل طلعت حرب وأنا كملت للميدان.. لقيت عربية الهرم نادرة الوجود، وركبت بعيد عن الشمس، وكان الطريق سالك، وصلت في نص ساعة.. ودي كانت أول مرة أوصل من التحرير للهرم في نص ساعة.. محمود كان عامل شعره بلون أصفر جميل كدا كله شقاوة.. ولما عمل لي آخر باي باي وهو بيدخل الشارع ويغيب عن عيني كانت ابتسامته أجمل بكتير من ابتسامة كريم.
د. سمير عبد الله حماد
د. محمد محسن ابو النور 
نسمة عبد العظيم تليمه
هند حمدي عبد الكريم السيد
م. اشرف عبد الصبور الكرم
ابتسام محمد فلاح
دينا سعيد عاصم
د. محمد عبد الوهاب المتولي بدر
د. نهله عبد الحكم احمد عبد الباقي 
د. عبد الوهاب المتولي بدر 
حنان صلاح الدين محمد أبو العنين 
زينب حمدي 
ياسر محمود سلمي 
د. شيماء أحمد عمارة 
فيروز أكرم القطلبي 
د. نهى فؤاد محمد رشاد 
2
-1
