اعتراف شخصي احتمال أمسحه بعد شوية. 

أنا بقالي سنتين بنام برة في الصالة على الكنبة!

عندي أوضة بتاعتي ومجهزاها لنفسي أول ما أخدت الشقة مع أولادي ومغيرة فيها كل حاجة وجيباها بينك في سيلفر وحاجة دلع والله????????، بس أنا قررت أنام برة جنب الباب عشان أبقى متطمنة وولادي يتطمنوا وهم حتى ميعرفوش السبب لتصرفي ده. 

مرة الساعة 2 بليل فيه ناس قعدت ترزع على الباب عندي بهمجية عشان عاوزين فلوس للعمارة وديه كانت وسيلة ضغط عليا عشان يستعجلوني ادفع، عقبال ما أنا صحيت الأولاد كانوا اتفزعوا من الصوت عشان أوضهم أقرب للباب مني، وحسوا بالتهديد لحد ما اتصرفت وادركت اللي بيحصل، ومع كام موقف تاني بقوا قلقانين فترة.. 

انا من ساعتها بقيت بنام زي القطط عين مقفولة وعين مفتوحة من قلقي عليهم ويمكن ده سبب من ضمن اسباب كتير لمعاناتي مع اضطرابات النوم، أي صوت على السلم ممكن يصحيني ويخليني أقعد بالساعات مش عارفة أنام.

شعور الخوف والقلق مع كل مرة ولادك - خصوصا في سن المراهقة زي أولادي- ينزلوا أو يتعاملوا مع الناس ضاغط جدا جدا، فلترة كل اللي بيشوفوه وبيسمعوه هنا وفي الشارع يوميًا غاية في الصعوبة والإرهاق، ضيف العبء المادي ومسؤولياتك كراجل وست وطاقتك اللي بتروح أصلا كل يوم فالأمر غاية في الصعوبة.

هونوا على بعض الحياة وأرحموا بعض، محدش يعرف التاني عايش ازاي وبيعمل إيه في يومه عشان يمر بأقل خساير ممكنة.. 

والفترة ديه حقيقي صعبة أوي عليا بشكل خاص، وعلى الكل بشكل عام. ❤️