مشوارك 7
الصدمة .....
و دي اللي هي النتيجة ، لانها في اغلب الاحيان بتبقي،صدمة ....سواءا صدمة مهببه علي دماغك لان مجموعك مش قدسقف الطموح الاسري ، او لانها ضربت معاك و خالفت كل التوقعات و جبت مجموع لا يتناسب مع مذاكرتك السطحية "من وجهة نظرهم عالاقل " ...... المهم دايما تحت السقف ، فوق السقف ، تخبط في السقف لازم النتايج تتواكب مع الصدمات ، و خصوصا في الشهادات ....ابتدائية ، اعدادية ..... او سلام قول من رب رحيم ثانوية ،،و دي هنفرد لها حلقتين تلاته زي الفصل النكد في مسرحية كوميدية !!!!
و سقف الطموح الاسري ده متعدد ممكن يوصل للنهائيات في جميع المواد مع استثناء درجة في العربي "اللي محدش كان بياخد النهائيات في ا ي جيل سبق جيل العباقرة الحالي !!! يمكن عشان معلمين من جيلنا هو اللي بيصحح لهم !!! ربما "
و ممكن مع بعض الناس يبقى مجموع محدد بنسبة مؤية معينة ، و غالبا بتكون نفس النسبة المؤية للقبول في كلية الطب في هذا العام ، بس يتم وضعها كسقف لك و انت لسه في الاعدادية "
و ممكن بقي السقف المفتوح ....انك تطلع الاول و خلاص ، و حتي السقف الطموحي الاسري المجموعي المفتوح ده له طبقات.....ّانك تطلع الاول عالفصل ، الاول عالمدرسة ، الاول عالادارة ، ....او لا قدر الله الاول عالمحافظة !!!!
الميزة صراحة ان الواحد كان بيحب اللعب علي المستوي المحلي ....مالها علي مستوى المدرسة لو صادف و طلعت الاول .... و طبعا مش،كل سنة و دي ميزة عشان سقف طموحهم في مجموعك ما ينزلش،علي دماغك لما تلاقي نفسك مثلا ناقص في،الرسم في الاعدادية سبع درجات ،،اياااام ما كان بيتضاف للمجموع.... و زيهم في العربي ، يبقي لو جبت النهائية في كل المواد ، و عملوا لك مستوي رفيع خاص بالاعدادية ابقي قابلني لو طلعت الاول غير علي نفسك ، المهم ان مجموعك ايامها دخلك فصل المتفوقين .....و ده وحده كان مشوار اخر !!!!

فصل المتفوقين .... و مجموع فوق ال 45 % !!!!

ايوووووه ...... دخلنا فصل المتفوقين بمجموع فوق ال 45% الرقم صح مش غلط .....ااااااه لا مش مجموع الاعدادية ...... مجموع الاعدادية المشروط لها وقتها كان 238/ 280 فما فوق
بينما ال 45 % دي كانت بتاعت اختبار الذكاء ، اللي بيدخلوه الطلبة اللي خدوا فوق 238، و اشمعنا 238 مش عارف ، يمكن دي درجة ابن مسؤل ما في حقبة ما فاتخذت مثلا مقياس كمقياس ريختر للزلازل .....ربما !!!
المهم ..... كان اختبار ظريف ..... و تتصدم لما تبقي بتحل زي الموتور لحااااد ما مخك قرب يشيط اساله غريبه في كل المجالات و رسم تخيلي و مسائل و معاني كلمات و علوم ،و تلاقيهم بيقولوا لك مبروووووك ، انت من المقبولين في فصل المتفوقين .... و انت تبقي زي هنيدي في بلية و دماغه العاليه ، و انت بتلاقي نتيحة نجاحك المبهر و اجتيازك للامتحان مش مكملة 60 % ، تبقى عاوز تسالهم متاكدين ان دي نتيجة مقياس ذكاء و ان احنا نجحنا.، و لا ده مقياس نسبة غبائي ،،،،،
طيب يمكن عشان سؤال الاستخدام غير المعتاد للاشياء زي المشبك و المسمار و غيره ، كانت من ضمن اجاباتي امسك مناخير زميلي ، او اخرم عين صديقي ، او افرقع كاوتش عربية خالي ، و هكذا جابت نتائج عكسيه في النتيجة ....بس كلنا واخدين النسب دي قريب من بعض ،،،، يعني كل اصدقائي اشرار زيي و انا مش عارف .... مش عارف صراحة ، المهم نجحنا بنسب تناسب مجموع دخول كلية الطب سنة 1958 ، و دخلنا فصل المتفوقين ، و يبدء مشوار جديد ذو طابع اخر ....و كان طابع انيل من اللي قبله صراحة !!!!

يعني ايه ثانوي ،،،، لا مش يعني تعليم ما لوش لزمة زي ما اللفظ بيوحي لك .....لكن ربما معناه ان دورك ثانوي في انك تستوعبه زي ما كنت بتستوعب من قبل .....يعني كانه بيقولك علي اولي ثااانوي بالتحديد ، ابقي قابلني !!!
و ده ليه ....لان العلوم بقي اسمه فيزياء و كيمياء و احياء .....لدرجة انك لو سمعت اسم علياء او نجلاء في المدرسة ايامها كنت تخاف ليكونوا فروع جديده للعلوم !!!!
و الدراسات الاجتماعية اللي كنا بندلعها و نقولها مواد ، بقت تاريخ و له مدرس ، و جغرافيا و لها مدرس تاني اخر ....بعد ما كانوا اخوات في الاعدادية في كتاب واحد "و لنااااا عند دراسات الاعدادية معي انا شخصيا ......وووووقفة ، ارجو تفكروني ارويها في حلقة ،اعمالنا الجليلة .....اعتقد الرسالة وصلت !!!!
المهم ، و كل دول كووووم في اولي ثانوي ،و الاختراع الصادم ايامها المسمي فرنساوي ....و ليه فرنسااوي مش فرنسي .....زي ما هو انجليزي مش انجليزاوي ،مش عارف !!!
رغم اني باحب اللغات جدا ، و كل شوية اتعلم لي شىء من لغة .....و عند الفرنساوي و تيجي لي حالة الاولي سنوي "مش ثانوي" و احس اني مش،طايق سيرة لا اتر و لا افوار و لا شكل ام الاكسون اللي تحسها فتحة بالعربي و اتسرقت !!!!
بمناسبة العربي بقي....فده في ثانوي بيتفرع و لا فرع صيدناوي علي مستوي مدن مصر!