فى ذكرى الجنوبى ...

 وهل هناك دليل على جبروت طاحونه الحياة اكبر من نسيان ذكرى أمل دنقل؟!!

(خَارَجيْن من الدرسِ كُنّا.. وحبْرُ الطفْولةِ فوقَ الرداءْ

والعصافيرُ تمرقُ عبرَ البيوت,

وتهبطُ فوق النخيلِ البعيدْ!)

"ملِك أم كتابه?"

صاح بي.. فانتبهتُ, ورفَّتْ ذُبابه

حولَ عينيْنِ لامِعتيْنِ..!

فقلتْ: "الكِتابهْ"

.. فَتَحَ اليدَ مبتَسِماً; كانَ وجهُ المليكِ السَّعيدْ

باسماً في مهابه!

"ملِكٌ أم كتابة?"

صحتُ فيهِ بدوري.. 

فرفرفَ في مقلتيهِ الصِّبا والنجابه

وأجابَ: "الملِكْ"

(دون أن يتلعثَمَ.. أو يرتبكْ!)

وفتحتُ يدي..

كانَ نقشُ الكتابه

بارزاً في صَلابه! 

الورقة الأولى من اوراق ابى نواس..احدى قصائد أمير شعراء الرفض (مش عارفه تحديدا اتسمى كدا عشان بيرفض ايه..بس هى التسميه معبرة)

الورقة الاولى لان القصيده مجموعه اوراق منفصله متصله..

الورقه الاولى هنا بتتلخص فى سؤال (ملك ولا كتابه؟) ..السؤال بيتخطى فكره لعبه الاطفال و بيتحول لموقف وجودى و اختيار مبكر جدا..حتختار (الملك) السلطه..النفوذ..الامان...و لا حتختار (الكتابه) بكل ما فيها من تحدى و مخاطرة و رومانسيه فاقعه فى نفس الوقت..اختيار قام بيه طفلين فى وقت مبكر جدا زى ما يكون مؤشر انتهاء الطفوله...

الاختيار هنا جه و معاه تبعاته...اللى اختار (الكتابه) طلع له وجه الملك مبتسما ..ما معناه اعمل حسابك..حتخبط فى دا ..

اللى اختار (الملك) طلعتله الكتابه...معلنه عليه التحدى ..حتى فى وصف النقش بالصلابه..الوصف فى ذاته عبقرى..صلابه وقفه الكلام امام جبروت الملك فى كل زمان ومكان..

الاختيار هنا مش مجرد اختيار لموقفين مختلفين فى الحياه وبس..لا دا اختيار لموقفين متضادين كمان..كل واحد فيهم نصيبه يقف فى وش التانى..حيسيبك و انت بتسال نفسك هو انا واخد اى جانب فيهم بالضبط؟ الملك ولا الكتابه؟!!! 

تيجى اللقطه العبقريه بقى...التى تخطت حدود الزمكان ..او جايز هى فعلا طول عمرها كدا..الورقه التانيه:

من يملكُ العملةَ

يُمسكُ بالوجهيْن!

والفقراءُ: بَيْنَ.. بيْنْ! 

تحس انه بيلقح على حد؟ باين...قصده ان الفلوس بتحرك كل حاجه و تخلى العلاقه بينهم لطيفه وظريفه؟ احتمال..من يمسك العمله؟ امممم؟ اممممم؟ قصدك انك لو روضت الكتابه استتب لك الملك؟ جايز..او جايز بيتكلم عن العمله عادى يعنى مش لازم مخك يشطح!!

أى كان قصده..اى كان اللى عايز يقوله..يمكن كان بيتكلم عاتشى يعنى واحد وبيوصف لعبه مع صاحبه وهما صغيرين...

على كل..مفيش حد اختار الملك وعاش اطول من حياه ملكه..ومفيش حد اختار الكتابه غير و عايش لحد دلوقتى..

..

واد ياللى كنت فاكر (أمل) واحدة ست..عارفاك...و حأجيبك..هاه!