بأراجع نفسى بقالى كام يوم..لانى استغربت لما لقيتنى بأستدعى كتير مصطلحات الحقبة الاستعمارية فى الحديث عن كرة القدم بشكل أوفر حبتين . اوفر اوى...ليه قافشه دماغى على مصطلح الرجل الأبيض (رغم أن منتخبه مش أبيض) و شايفه اى حاجه تنكد عليه حتى لو ماتش كورة حلوة! رغم انى مش مؤمنه بالعداوات التاريخية الا لو الأيديولوجي اللى خلق العداوة مازال موجود وعايش وبيتروج له؟ 

  أظن دا نتيجة الاستفزاز..تراكم استفزازات من الحلو الأبيض من قبل المونديال....دبدبه فى الأرض عشان فى قطر الوحشه (بصرف النظر عن موقفنا من حكام قطر) ...عشان هما بياكلوا حقوق العمال ....وحقوق الإنسان...وحقوق النشر..و حقوق اى حد انا كأبيض شايف أن له حق....لكن الحق دا انا آكله عادى.انا ابيض متفوق متقدم آكل الحق اللى انا عايزه..

عجرفه ولويه بوز .. ألمانيا لن تحتفل فى قطر... كل شيء واى شىء غير كرة القدم لنقد الدولة المضيفة (الغير أوروبية) من باب الاستكبار و الغطرسة....نظرة الأوروبي للعالم كقطعان عبيطه يقف هو منها موقف المدرس والمعلم ...الآخر عنده يساوى العدم...شويه تصريحات تحس بيها أن واحد ماسك جمجمتك وواقف يشاور على الفروق بينها وبين الإنسان ومدى تشابهها بجمجمة القرد...هما اللي استدعوا المصطلحات الاستعمارية من دماغى...

يا سيدى احنا عارفين انك رئيس مجلس إدارة العالم ... لكن بلاش تتعجرف اوى كدا وبص لنفسك ...لان جزء لا يستهان به من تفوقك قائم على (قشط) وش الكريمة من باقى العالم..أبناء الآخر المتفوقين...فبلاش تنظير عليا وحياة اهلك عشان اذا كنا لا ندير العالم معك بشكل (أممى) فاحنا بنديره معاك بشكل فردى..

الرجل الأبيض حول كاس العالم لصدام حضارات زى اللى تنبأ به صموئيل هننجتون ...أن اى خطوط تلاقى بين الحضارة الغربية فى نسختها الأوروبية مع اى حضارة أخرى هى خطوط "صدع" ...خطوط صراع محسومه مقدما لصالح الابيض..طب صدع بصدع...وأى حاجه تصدعك سلميا انا معاها .. سواء كان منتخب اليابان أو منتخب المغرب..

فى النهاية كل منتخب حيرجع بيته..وكل لاعب حيروح النادى اللى هو محترف فيه... ومفيش ظروف حتتغير فى اى بلد بعد ماتش كورة..لكن يبقى ذلك الصداع الذى سببناه للأبيض وأخباره أنه ليس وحده فى هذا العالم شىء جميل باعث على البهجة..حتى لو كان لليله واحده.