و لا عمري فهمت لما كانوا بيعلمونا ان الحكمة من الصيام اننا نحس بالفقير ... طب ازاي ما الفقير كمان هايصوم !!! .... و لما هانفطر كله هايفطر على أد مقدرته ... دا يمكن دلوقتي البهرجة اللي ف الفطار تتنافي تماما مع الحكمة من الصيام !!!

بفكر ان الصيام صورة آخرى من قصة سيدنا آدم اللي بشوفها قصة البشرية كلها على مر الزمان ... القصة ف النهي عن "حلال" ... لا شجرة آدم كانت حرام في حد ذاتها ... و لا الأكل و الشرب حرام في حد ذاته ... الصيام تعود عن الطاعة ف النهي عن حلال شهر ف السنة .... 

كل واحد ممكن تكون عنده "شجرته" ... اللي شايفها عادي ما هي حلال للناس كلها ... لكن انت منهي عنها ... مش من حقك لحد دلوقتي ... و أنت و نفسك و شيطانك هاتقدر عليه و لا لاء ...

فكرة ان الواحد يطلع من الصيام عشان يأكل من حلال حرم منه ساعات من غير ما يفكر اذا كان اساسا ممتنع عن حرام و لا لاء مخيفة ... 

صعب أن الواحد تكون العبادة مظهرية امتناع ظاهري من غير ما حاجة تتحرك من جواك ... لا هي حكاية اكل و شرب و لا هي حكاية نحس بالفقير اللي صايم برضو ... هي حاجة لازم تتحرك جواك ... 

دمتم صايمين عن كل حرام ... متنعمين بكل حلال ... بعيدين عن الشجرة التي نهينا عنها مهما كانت اغواءات الشيطان ...

????