تجمع عائلي ف صالة و نور مطفي 

و كوب سحلب عليه قرفة بينزل قلبنا يدفي

و فيلم السهرة ع التانية لأول مرة بنشوفه

و فيه عيل نسوه اهله يعاني وحدته و خوفه

ما اصل الأهل دول عزوة وجودهم جمبنا يكفي

و ابويا معدي ف الصالة يقول ما كفاية قوموا ناموا

فنعمل نفسنا نايمين .. دة طبعا بس قدامه 

و لما يروح ينام هو بنجري نكمل السهرة 

نشوف مشهد يضحكنا نروح نضحك بصوت مخفي

و بعد الفيلم برنامج ميعجبناش نقوم قالبين

نلاقي حفلة ع الاولى فنستنى هنسمع مين

اقول لاخويا قوم اقلب يقول لأ بصوت عالي

فيرجع بابا ع الصالة بسرعة قوام نقوم نطفي

نخش ننام على سريرنا و نتقلب مجاش النوم

فنحكي ف رغي ع الفاضي كلام فارغ ملوهش لزوم

و لكن بس نتونس بحبايبنا و نحضنهم

و ناخد ذكرى وياهم ما ننساها لحد اليوم

سنين عدت على قلوبنا و سابت فيها كوم علامات

في فرح و حزن و نجاحنا في آهة و برضو ابتسامات

و طعم الدنيا اتغير كبرنا و شكلنا صغير 

و غاب عن ودني صوت ابويا و لما سألت قالولي دة مات