يا نسمة هانم..

ما تغيبيش تاني كده

 ادعي يا دايم.. 

صحصحي ورق الشجر

مدي بساطك في النِّدا

إحيي العزايم..

برّدي جباه البشر!

 

تختفي..

فالصهد يقهر ف الندى! 

 

تحضري

فتهوّني حرّ السهر

ف عمْر دايما يتسرق

وحلم خايف يتحرق

مابين حبوس بتتخلق

 

وهواكي هايم.. 

حاير..

 مش لاقي هُدى

تايه ..

ما بين الفايت.. والقدَر  

 

حرة النسايم

ما تجيش غير بالرضا

أجري ف حوشها.. يمكن أحوشها  

 توقعني القدَم.. هَدَر

 

وأنا أصلي صايم

فطاري قاصره ع الصدى 

شايي بلا سكّر.. 

بارد.. ياما انتظر

 

بالأمل حالم..

على حرف شباك المدى 

صامد.. ومستني الثّمر

 

يا نسمة هانم 

ما تغيبيش تاني كده

ده النبض ف وجودك..حَضَر

 

#غنوتي_من_نسيم