موضوع تعرضت للتفكير فيه كثيرا مؤخرا ، بعدما أتتنى ردود أفعال و أراء من أكثر من شخص ، كبار و صغيرين ، بنات و أولاد ، متزوجين ، مخطوبين ، مطلقين ، عزاب ، و باحثين...و أظن أن كل من سيقرأء الموضوع سيرى نفسة فى أحد الشخصيات... مثلما ارى أنا نفسى فى أجزاء من الأراء التى أستمعت اليها...

الحقيقة ما جعلنى أفكر كثيرا فى الموضوع هو تناقض الأراء و إختلافها من شخص للأخر ، و من تجربة و غيرها ، و من سن و غيره...

حينها وصلت لحائط ملئ بعلامات الإستفهام الكبيرة ... ما هو الجواز ... كيف نتزوج ... متى أقول ممكن أتزوج الشخص ده ؟؟؟

حينما قال لى أحد أبناء تحت الواحد و العشرين ، أنا عايز أتجوز .... قلت له بمنتهى التلقائية : و أنا كمان !! و أخذنا نضحك نحن الأثنين :)

حينما قلت لها أنتى بتفكرى تتجوزى تانى بعد طلاقك ؟ ... قالتلى لااااااا .... انا أديت كل اللى عندى زمان.... خلاص ما عدش عنى حاجة أديها ... ... و صمتنا نحن الأثنين !!

مش هناقش مشاكل الجواز الكثيرة ، من مشاكل مادية من شراء الشقة ... من فرش الشقة ، من الشبكة و غيرها من ماديات ... لأنى مقتنعة أنها مش هى دى مشكلة الجواز الأساسية ...

و مش هناقش مشكلة عدم وجود الناس " الكويسة" " ولاد الحلال" اليومين دول ، أو بمعنى أدق ، قله عدد الناس المتربيين بجد من شباب و بنات ، و ندرة العثور على من تجد فيه الأخلاق و الصفات المناسبة ... لأنى أرى أنها مشكلة فعلا ، مشكلة لا يوجد لها حل بشرى بأيدينا ، أنها فى يد الله وحده ، و هو القادر على تدبير التدابير للقاء من يكونوا مناسبين...

و مش هأتكلم على مشاكل بعد الجواز ... لانى مقتنعة انه بالرغم من حتميه وجود مشاكل ، الا أن الإختيار السليم لشريك الحياه ، سيجد حل لجميع المشاكل...

إذا المشكلة الحقيقة هى قناعتنا الشخصية و وجهه نظرنا الشخصية فى موضوع الزواج ...و كيفية تحديد و إختيار شريك الحياة المناسب و لأى مدى نحن على الطريق الصحيح لما يريده الله لنا...

بداية أود أن أعرف الزواج من وجهه نظرى و هو : الإرتباط بشخص واحد مدى الحياة ، و مشاركته فى جميع أوجهه الحياة من أفعال و مشاعر و أفكار ... مشاركته فى السراء و الضراء ... عالحلوة و المرة ... مساعده كل منا على سعادة و نمو الأخر و مواجهه الحياة بفرح معا ...

و أسمحولى أبعد فكرة الطلاق من تفكيرنا دلوقتى لانه لو فكرنا من دلوقتى فى الفشل و فى إمكانية الإنفصال ، يظل الإختيار ناقص الإقتناع التام بفكرة الزواج ، يظل إختيارغير كامل.

باسمع شابات بتقول :

انا مش عايزة أتجوز دلوقتى ... انا مش عايزة أتجوز أصلا ...
انا عايزة أتجوز ، بس خايفة من الخطوة الكبيرة....
انا مش هأتجوز بالطريقة التقليدية.... انا نفسى أتعرف على حد بالصدفة ... و الموضوع يبقى طبيعى.....
مش لاقيه حد مناسب ... يحتوينى و يحسسنى بالأمان و أحس أنه راجل ، مسئول ...
انك تلاقى حد كويس و أبن حلال بقى صعب....

بأسمع شباب بتقول :

عايزين نتجوز .... بس إزاى اتقدملها من غير ما يكون معايا الأساسيات...
فين بنت الحلال اليومين دول....
انا مش فارق معايا موضوع الجواز دة خالص....
انا عايز واحدة تسمع كلامى ... تعمر معايا...
انا عايز واحدة تحبنى بجد...

بأسمع المتزوجين و الأباء و الأمهات بيقولوا :

مستعجلين على ايه؟؟ .... على الهم ؟؟
ما فيش أحسن من جواز الصالونات ...
الجواز دة مشروع فاشل...
دماغكوا ناشفة و عايزين الضرب....
كله بالخناق ما عدا الجواز بالإتفاق...
ما فيش حد كامل ، و جوزك على ما تعوديه...
ما حدش بيتغير بعد الجواز ، ما تتخيلش أنكوا هتغيروا بعض ...
هتحبيه بعد الجواز.... ما احنا اتجوزنا من غير ما نحب و اهو ....

غريبة صح؟؟

اللى حاسس انه وحيد... مشكلته أنه عايز زوجة أو زوج.... اللى حاسس انه ناقصه حاجة ، عايز يحب... اللى شايف أنه مبسوط علشان لسة ما أتجوزش....و اللى شايف أنه ماعدش طايق الحياة لانه متجوز.... يعنى فيه إيجابى و فيه سلبى

البنات تقولها عايزة أيه؟؟ تقولك عايزة أتجوز.... و فيه بنات تقولك... مش عايزة أتجوز..... الولاد طيب عايزة أيه؟؟؟ الولاد عايزة تتجوز....و فيه ولاد مش عايزة تتجوز ......و ما بين كدة أو كدة ما حدش مرتاح....
لا اللى عايز يتجوز... عارف يتجوز ... و لا اللى أتجوز عارف يعيش.... و ناس كتيرة ملسوعة من الشوربة و بتنفخ فى الزبادى...

و بأفتكر ساعتها الأغنية اللى بتقول... كتير بنعشق و لا بنطول... و كتير بنعشق و لا بنقول.... و مافيش حكاية بتستمر، زى ما بدأت ليه على طول؟؟

عندى بقى أسئلة فى الموضوع دة دايما محيرانى ، و مش لاقيالها أى اجابة...

ليه فيه ناس بيجيلها الجواز لغاية عندها و ترفض، و ناس بتدور على الجواز و لسة مش لاقياه؟؟؟

نظرية النص الحلو سليمة و لا غلط ؟ أن فى الأول كنا زى الدايرة ، و بعدين لما أتقسمنا نصين ، توهنا فى العالم الكبير ، و أصبحنا بندور على نصنا التانى فى الكون الكبير... بمعنى أن فيه حد واحد بس هو المناسب ، هو اللى ربنا خالقهولنا من البداية و هو بس اللى ممكن يسد كل فراغنا ...

طب لو لقينا نصنا الحلو دة ... بس ما طلعش من نفس جنسيتنا ، أو مش من نفس بلدنا ، أو فيه صعوبات أو موانع تمنعنا عن الزواج ؟؟؟ هل من الممكن أن نقف ضد كل الأصول ، و المجتمع و نعمل المستحيل علشان نتجوزه ، و هل دة صح و لا غلط أصلا؟؟؟

كل الناس اللى عايزة تتجوز ، شايفة ان مشكلتها الوحيدة انها محتاجة تتجوز ، هل فعلا بالجواز بتتحل مشكلتنا و بنبقى قرحانين و سعداء؟؟؟

و لا على راى الناس التانيين اللى بيقولوا أن بالجواز بتبتدى المشاكل...؟؟

ماذا لو مشاعرنا تغيرت بعد الزواج؟؟؟

هل نعوز الجواز لدرجة أنه يهرب منا ، و لا نسيبها على ربنا و هو يجى لغاية عندنا؟؟

حاجات كتيرة محيرانى فى موضوع الجواز دة ، بس أكتر حاجة بتقلقنى منه ، ان أغلبية الناس مقتنعة انه زى البطيخة.... ممكن تكون من بره حلوة جدا... و لكنك لما تعيش ، تفاجأ انها طلعت " قرعة" و طلع اللى من بره دة كان مجرد شكل ووهم و الموضوع من جوه مختلف تماما...بس للأسف أكتشفت دة بعد ما الفأس وقعت فى الرأس و أشتريت خلاص... قصدى أتجوزت خلاص....

الحاجات اللى محيرانى دى فعلا مش لاقيالها إجابة ،

و لكن يظل وجود من يتزوجون ، من هم متفائلين ، من هم سعداء بالزواج ...
سبب فى إحتفاظى إن شاء الله بتفائلى ...

:)