الصورة الأولى...الحلم

الحلم زي السحاب ....يهرب مهما نناديله
يسعد قلوبنا صحيح ...وعمر إيدينا ما تطوله
غريب يا قلبي بتحلم ...والزمان جارحنا
يمكن يصادفك أمل .... و يقصرلنا طوله

الصورة الثانية ... قصة مكررة

دفن الحقيقة في قلبها طرحت ورود
وإتشكل الحلم الحزين بعيون جميلة منورة
يا هل تري الحلم مكتوب له الخلود ؟
ولا الدنيا مصممة تغزل حقيقة مزورة

الصورة الثالثة ..حقيقة

بهلوانات أنا وأنت يا صاحبي في سيرك الدنيا المنصوب
فيها الطيب هوالقاتل والغالب هوالمغلوب
مهما قاريت اللعبة يا صاحبي مش راح تفلت مالملعوب
كله بيلعب فيه علي كله أهي دي القسمة والمكتوب

الصورة الرابعة .... ذات

أنا . .
أنا نسمة و حيرانه ما بين شطين
و نقطة ميه غرقانه في بحر حنين
أنا قصة و بتدور
علي نبض القدركائن
في أنهي جبين
أنا اللي العمر وداني
وجابني لتوهه من تاني
و لسه بصدقه وبامشي
لسكة خطاها قتلاني
لكني لسه بستفهم
بخوف ماضي كما السكين
يا دنيا الغدر يا خاينة
خطاوي العمر رايحة لفين ؟

الصورة الخامسة ..... ألبوم صور

عمالة أقلب في الصور
والقى ابتسامتي لما أشوفكوا
منورة
هي الحقيقة في الصور
ولا الحقيقة يا ترى في ما جرى
مبسوط قلبي منكم قوي
لأنكم سيبتوا الصور
الصور أوفى حقيقي
واقفة جنبي وقت ضيقي
بتواسيني بتناجيني
بتريح دمعي وانيني
بس يا خسارة
الخسارة في الحقيقة
إنها مجرد صور .

رانيا ثروت