من دفتر رانيا :
أستاذ سهدي صبحي حنا ????
أستاذ أول الرياضيات بمدرسة كليوباترا الإعدادية والاسم الحركي بين البنات "أستاذنا الأمور "???? ليه بقى عشان أستاذ سهدي كان شابا بالرغم من إنه مدرس أول و كان أشقرا ???? وعيونه فيروزي ????وكان وسيم جدا فعلا .. كان بيدرس لأشقى فصلين وأكثر الفصول تفوقا برضه تالتة أول اللي كنت من طالباتها و تالتةتاني والفصلين كانوا قدام غرفة مدرسي الرياضيات المتوج عليها ا. سهدي طبعا.
بالنسبة لي أنا كل ده ما كانش مهم مش ده اللي فرق معايا خالص في أستاذ سهدي خاصة إن أنا المعقدة بتاعة الكتب والمذاكرة وأمينة الفصل طوال سنوات الدراسة من ابتدائي لحد ثانوي وكمان شرطة مدرسية يعني سلطة تنفيذية بتاعة الظبط والربط ????
اللي فرق معايا فعلا إن أستاذ سهدي كان إنسان مهذب جدا ومتزن وحكيم جدا وأمين جدا وبيعتبرنا زي إخواته الصغيرين فعلا، كان آمين جدا في الشرح لدرجة إن الفصلين حصلهم طفرة في مستواهم في الرياضيات بعد معاناة ????
أصل أنا وزميلاتي كنا قد ابتلينا بأستاذ الله يسامحه في سنة تانية اعدادي طلع عنينا وخلانا نكره الرياضيات ونجيب درجات ضعيفة جدا واشتكيناه أكثر من مرة ولم يحدث معه أي شيء فده أثر علينا في سنة ثالثة إعدادي طبعا وكنا محتاجين نحل تمارين كتير وحد يصحح ويتابع، خاصة بعد ما حبينا الرياضيات على يد ا. سهدي اللي عمل معجزة حرفيا .
المهم طلبنا منه ناخد درس عنده فأول سؤال سأله لنا "هو أنا قصرت معاكم في الفصل؟ " تخيلوا ????
ولما شرحناله إن المسألة مفيهاش تقصير وافق وبالفعل خدنا عنده درس بمقابل زهيد جدا مقارنة بأسعار الدروس وقتها، الغريب إن شرحه في الدرس هو هو في الفصل الفرق المتابعة والوقت الزيادة في حل التمارين واللي كان بيجاهد فعليا عشان يطبق مثيله في الفصل .
تقريبا بقينا مدمنين حل رياضة، كان عبقري فعلا
أنا عن نفسي حصلت بسبب شرحه على 57من 60 في اختبار الشهادة الإعدادية .
بس برضه مش ده المهم ، المهم اللي كان بيعلمه لنا واحنا بنتكلم معاه، لما كان بيقول لنا اوعوا تكذبوا أوعوا تفتكروا إن اللي أنتوا عايزينه من ربنا أحسن من اللي عطاه لكم
وحاجات كتير،كان بيتكلم معانا في التاريخ والفن والثقافة والأخلاق .
كان بيحل أي مشكلة في الفصول بحكمة وهدوء شديد
كان صعب جدا يتعصب وكانت له هيبة البنات كانوا بيعملوا له ألف حساب، كان واعي جدا إنه وسط بنات وعارف يتصرف إزاي.
طلع معانا رحلة هو وزوجته وولاده مارينا وريمون
زوجته ست طيبة وظريفة وخلوقة وولاده الصغنتتين خالص دمهم خفيف وجمال جدا ربنا يبارك له فيهم
كانت رحلة لرشيد كان بيكلمنا عن خلق الله في الشجر والنيل وتاريخ البلد وبيت زبيدة وغيرها
وكان ماشي معانا حماية فعليا عينه زي الصقر خوف أخ مش أستاذ.
فضلت أسأل عليه وعلى أساتذتي لحد ما الأرقام اتغيرت لكن مابطلتش دعاء لهم.
لما اتخرجت وقلت له ولما عزمته على فرحي بكى وفرح قالي كبرتي خالص وبقى بينادي زوجته ويقولها رانيا بتعزمني على فرحها بكيت أنا كمان على بكاه وفرحته دي. ????
العلاقة بين الطالب والمعلم كانت مقدسة زي المتدربين ومعلمي الكونغ فو في معابد التبت ، المعلم كان كبير قوي حتى لو كان شاب وكان بيربي روح ونفس قبل العقل وكان قدوة حقيقية.
متهيألي خسرنا كتير بتشوه العلاقة دي ☹️
سلام حتى يفني السلام لأستاذي سهدي صبحي حنا ????????
ولأساتذتي في ابتدائي واعدادي وثانوي وأساتذتي العظماء في كلية تجارة ولأساتذتي دلوقت في الأكاديمية ????????
حتى يفنى السلام لهم كل الاحترام والمحبة والتوقير هم وكل من اتعلمنا منه أي شيء ينفعنا وينفع غيرنا دنيا وآخرة.
رانيا ثروت
د. احمد البحيري 
آية عطية عبد الفتاح الغمري
محمد حماده رزق السيد الشافعي
محمد سعد الدين محمد شاهين
هبة سامي علي
ياسر محمود سلمي
م. اشرف عبد الصبور الكرم
محمد عبد الرحمن محمد شحاتة 
أيمن موسي أحمد موسي
مريم محمد شعبان محمد (توركان)
د. عبد الوهاب المتولي بدر 
حنان صلاح الدين محمد أبو العنين 
د. زينب عبد السلام محمد أبو الفضل 
د. عزة محمد بركة 
د. محمد عبد الوهاب المتولي بدر 
د. شيماء أحمد عمارة 
زينب حمدي 
نادين يسري يونان 