أوعى تفكر إني...
بضحك ...بتنطط
بتشاقى.. بتعفرت
م القوة ...
بالعكس
ده من كتر الضعف
الهم لو حاوط قلبي
مابشوفش
فبشق بضحكة قلبي سبيل
الناس مش عارفة
مش فاهمة
مش شايفة
وجع القلب يهد الحيل
ويركبك كل الأمراض
الحزن لما يزيد الحد
يروح للضد
فرحة وتنطيط
وحياة جوز خالتك واللي جابوه
متعملش فيها ناصح و حويط
وتفتش في دفاتري كفاية
مش حتشوف في الدفتر ده
جرحي المهري
ولا ضهري المحني
ولا كسرة نفسي
وبكايا ....سنين
حتشوف ضحكة وغمازتين
بفتح بيهم نفس الناس
وبشق لقلبي وروحي سبيل
وبقول الناس مش ناقصة تشيل
يا أشيل وياهم لو أقدر
يا أضحك وأضحك
والضحك يشيل
لو تعرف إيه القصة بجد
حتستعجب فوق الحد
وتقول دي كتافها شايلة إزاي
وإزاي بتهزر وتهرج
وبشنبات وقت الجد
مشكلتي إن محدش فاهم
وأنا مابفهمشي البني آدمين
يفهموا على كيفهم وأنا مالي
أنا بحكي لربي وأقوله آمين
راضية وسعيدة بعطاياه
خيره مغرقني سنين وسنين
والمر اللي في قلبي مسيره
يمشي يختفي وخلاص أنساه
الغلب مايغلبش الواحد
وهو في قلبه مكتوب الله

رانيا ثروت