اركب حافله ( اتوبيس ) في رحلة طويله من الجنوب الي الشمال .. 

توقفنا في استراحة ( ريست ) من ضمن تسعين استراحة تتوقف فيها هذه الحافلة السلحفاة ... 

الفتاه الوحيده التي في رحلة ... فتاه عاديه جدا ... بنطلون جينز .. تيشيرت عادي ... مقبولة الشكل .. تقدمت نحوي و سألتني سؤالا .. من تلك الاسئلة التي يفهم منها انها تريد ان تفتح حديثا (تجر كلام يعني ) ...

توالي تبادل الاسئلة التعارفية المعروفة .. و التعليقات المحفوظه عن سوء حالة "الاتوبيسات" .. حتي سألتها سؤالا روتينيا لاستهلاك الوقت : و حضرتك بتشتغلي ايه فندم ؟ 

ردت بمنتهي الهدوء و الثبات و بثقه : رقااصة 

- مين يا فندم ؟ ????

- رقاااصه في ملهي .. مالك مستغرب كده ليه !!! 

- لا يا فندم العفو .. بس هو ريحة الشرابات اللي في الاتوبيس عاملالي دوار 

- شكلك اول مرة تركب اتوبيس البحر الاحمر

- لا يا فندم .. احمرت كتير ..قصدي جيت كتير .. بس دي المرة الاولي اللي اتشرفت بمقابلة حضرة رقاصة وجها لوجه و ده شرف كبير طبعا  

- و حضرتك بتشتغل ايه بقي 

- انا ؟!! 

- ايوة انت .. مالك "خايف" كده ليه.. 

- لا لا لا ... خايف ايه .. حاسبي .. انا مبخافش اصلا  

- واضح عليك فعلا.. مش هتقول انت بتشتغل ايه ..؟؟

- انا ... مممم انا .. انا بشتغل .. نجار مسلح

- انت ؟!! 

- ايوة .. يعني رئيس النجارين .. او نجار اول .. زي ما تحبي 

رمقتتي بنظرة من فوق لتحت .. تقريبا استنكارا علي ترقيتي .. او مش عارف الحقيقه .. و مشيت الحمد لله تعالي و له الحمد ...

في اتوبيسنا .. رقاصه يا جدعان ????

-