و من الحب ما قتل

كان فى عندى عصفورة كناريا ، بيضا و جميله و كنت بحبها و بخاف عليها بطريقة رهيبه ، و كنت متعود أنى أسيبها تطير من وقت التانى و لكن جوه البيت مش أكتر ، و لكن من خوفى إنها تطير بعيد عنى و مترجعش تانى ليا ، قررت أشترلها قفص من الدهب الخالص !! و مليت القفص بكل أنواع الأكل ، كل ما لذ و طاب ، مع أنى عارف ان دة مش أكلها و لا حتى دى طبيعتها .
و كنت كمان متأكد إنها هتعيش معايا أجمل حياة ، و تسعدنى بصوتها الجميل و نغماتها المبهجة .
و لكـــــــــــن !!
بعد وقت قصير بدأت أسمع نغمات حزينه و صوت موجوع !!
و للأسف أهملت ف أنى أشعر بيها ، و قلت مع الوقت هى هتتعود !!!
و فجأة و بدون مقدمات ...
ماتت عصفورتى !!
و مازلت حزين عليها ..
و لحد هنا خلصت حكاياتنا .
سامحوني لو الحكايه حزينه ، و لكن حاولت أجمع كلمات توصف اللى بنعمله فى أحبابنا و الناس اللى شاريه حبنا معرفتش !
الأكيد إننا كلنا حبينا أو مازلنا فى علاقة حب و لكن هل فكرنا إزاى نحافظ على الحب دة من الإختناق و الموت بالبطئ ؟
هل فكرنا فى إحتياجات الطرف الآخر زى ما بنفكر إزاى هما يلبو إحتياجاتنا ؟
هل فكرنا فيهم ، هما بيحبوا إيه أو بيكرهوا إيه؟
و مع الوقت إكتشفت من خلال لقاءاتى مع شخصيات كتير إننا بنقتل الحب تحت مسمى الغيرة ، و الخوف على الحبيب من الناس .
و تناسينا إنه بشر ليه كامل الحريه و الإرادة .
و إنه إختارنا من وسط العالم كله علشان نعيش سوا أجمل أيامنا و و نصنع سوا ذكرياتنا .
تعالوا نعرف سوا إيه الأسباب اللى تقتل الحب سواء من طرفنا أو من طرف الحبيب .
* أول سبب يقتل الحب مهما كانت قوته و هو { الأنانيه و حب الأمتلاك } و كتير مننا سمع كلمات كتير زى ( أنت ملكى أنا و بس ) ( أنا اللى أقرر تعمل أية و تروح فين ) ، و هنا الحبيب بيشوف نفسة مجرد دميه بين يد الطرف التانى ، مش إنسان ليه كيان و حياة .
و عكسه طبعاً الإهمال، علشان كدة الاعتدال مطلوب .
* تانى سبب يقتل الحب و هو الغيرة المفرطة ..
بتكلم مين ؟ .. بتروح فين ؟.. بتعمل ايه ؟ .. أتاخرت ليه ؟ متبصش لحد ... متكلمش حد .
هات الفون أفتش فيه ، و كم من التحقيقات الرهيبه ، تحت مسمى الحب ، و كأننا بنوصل للشريك التانى إنه غير جدير بالثقة نهائي .
* تالت سبب و هو عدم إحترام الحقوق و المساحة الشخصية و هنا هحكيلكم عن كلمات سمعتها بنفسي من شكوى حقيقية لبنوته فى اى لقاء بينها و بين المسمى بالعريس المصون
قالها بالحرف الواحد...
بصى يا ست الناس أنا مش بحب مراتى يكون عندها اى سوشيال ميديا ( لا فيس بوك ولا واتس و لا اى موقع للتواصل )
قالها كمان انسي نهائي طريقة لبسك انتى من يوم ما هتدخلى بيتى هتلبسى العبايات السودا فقط لا غير .
مفيش حاجة إسمها هروح بين اهلى لأى سبب من الأسباب لوحدك لازم اكون معاكى ، و طبعا دة يوم إجازتى من الشغل .
و كل دة لأنى بحبك و بخاف عليكي من الهوا !!
طبعا كلمات مضحكة لأن جواها سم مميت بمعنى الكلمه . و كان ردى عليها بكل وضوح أنها لازم ترفض العريس دة مهما كانت بتحبه .
* عدم التوافق الفكرى و الإجتماعى ، يمكن ف بدايه العلاقة الاختلاف دة مش بيظهر و لكن مع الوقت هتكون عواقبه وخيمة على الطرفين .
و زى ما اتعودنا أن مع كل مشكله أنى بحب أقدم الحل ف هنا الحل هيكون في كذا نقطة ...
أولا: لازم يكون فى توافق فكرى و نفسى بينى و بين الشريك .
ثانياً : وضع حدود لكل طرف ، و عدم اختراقها لأى طرف منهم ، و أهمها ( الاحترام المتبادل بينهم )
( التقدير و عدم الاهمال)
( الاهتمام اللى يحافظ على الحب مش يقتله بالتملك) .
ثالثا و دة مهم جدا ... لو لاحظت عدم التكافئ فى كل مجالات الحياة بينكم يبقى ننهى القصة من البدايه ، و ملهاش لازمة خالص أنكم تكملوا تحت مسمى ( أكيد مع الوقت هينغير )
رابعاً ... القبول على نفس الوضع ،،، بمعنى أن محدش بيتغير أبداً و أن حقيقى الطبع يغلب التطبع ، ف وهم أنه ( هيتغير علشانى ) دة تنسوه نهائي
خامساً ... الحب الغير مشروط ، بمعنى أنا بحبك زى ما أنت مش زى ما أنا عايزك تكون .
أتمنى أكون قدمت مقال و كلمات تسعدكم و توقفكم على الطريق الصحيح لأى علاقة حب .
دمتم بخير أعزائى القراء دائماً و أبداً