مميزات الكانسر المرحلة الرابعة:
١- مش مضطرة أعمل خطط طويلة الأجل ولا خطط من أصله من أي نوع، ولا اجتماعية ولا حياتية ولا أي حاجة خالص.
٢- بقيت بأقدر أكتر وأكتر اللحظة الراهنة، بعد الكانسر أول مرة في ٢٠٠٧ اتعلمت أقدر اللحظة الراهنة، دلوقتي بقى التقدير أكتر بكتير، يا عالم اللي جاي حيبقى وضعي إيه، بأعرف أتحرك وآكل ولا إيه، فاللي إحنا فيه دلوقتي الحمد لله عليه أوي.
٣- انتهى تماما تأثير التعليقات السلبية على وزني، طول عمري بتجيلي تعليقات سخيفة على وزني وإني لازم آكل ولازم أتخن، بعد الكانسر الأولاني كنت بأرد رد سخيف بكل لطف على معظم التعليقات، كان في بعض الناس من معزتهم ما كونتش بأقدر أسخف عليهم، إن أنا عاملة ريجيم علشان ما أطلعش من مقاس xs، مقاسي طول عمري ومقاسي حاليا الحمد لله، بعد ما كنت وصلت s بدون مبرر طول ٢٠١٩، دلوقتي بقى أي تعليقات على وزني أو أكلي كأني مش بأسمعهم، أنا في آخر أيامي يا جدعان يفرق معايا في إيه إني أربرب، الحمد لله إني لسه بآكل طبيعي وبأتحرك.
9