اسباب ارتفاع درجة حرارة محرك السيارة

طبعا إحنا دخلنا في فصل الصيف وكلنا عارفين إن مشاكل السخونه بتظهر جليآ في الفصل ده .

هنفهم مع بعض بطريقه علميه أسباب السخونه و أنواعها مع تفنيد لكل سبب علي حده .

خلينا الأول نعرف أسباب السخونه في عناوين كده :

#أولا_تسريب_في_دائره_التبريد

#ثانيا_سدد_في_دائره_التبريد

#ثالثا_تبريد_سائل_التبريد

#رابعآ_تقليب_سائل_التبريد

#خامسا_ورود_معلومات_خاطئه_عن_حراره_المحرك

 

- حدوث سخونه في السياره مش هتخرج بره الأحتمالات دي والأحتمال الأخير واللي بعتبره نتيجه مش أحتمال هو #جوان_وش_السلندر وده بيحصل نتيجه إننا أهملنا وتجاهلنا الأسباب أو الإحتمالات السابق ذكرها 

هنبتدي مع بعض نفند الأسباب دي تفصيليا 

 

#اولا_تسريب_في_دائره_التبريد 

وده بيكون عرضه ليه كل أجزاء منظومه التبريد زي

الردياتير-كوعه الثرموستات -ماسوره مياه-خراطيم-قربه المياه- غطاء القربه -الخ

وده في الغالب بيكون نتيجه عدم أستخدام سائل تبريد بالمواصفات الفنيه الصحيحه أو أستخدام مياه عاديه اللي بتاكل في الأجزاء دي نتيجه تراكم الصداء والأكسده عليها .

 

#ثانيا_سدد_في_دائره_التبريد

السدد ده ممكن يحصل بسبب #الثرموستات أو #الردياتير أو #سربنتينه تكييف السخن 

وطبعا أي سدد في الأجزاء دي بيمنع سائل التبريد أنه ياخد دائره التبريد الطبيعيه بتاعته فالبتالي سخونه السياره 

وده إحنا كمهندسين أو فنيين في المجال بنشخص السدد ده من خلال اختبار اسمه touch test 

زي أنك تلمس الخرطوم اللي داخل للجزء المحتمل وجود سدد فيه ونلمس الخرطوم اللي خارج منه ونلاحظ فرق درجات الحراره مابين الداخل والخارج 

وطبعا مشاكل السدد دي بتبقي معظمها بسبب أننا بردو مش بنستخدم سائل التبريد الخاص بالسياره وأستخدام مياه عاديه اللي بعد كده بتعمل صدأ وأكسده ومع الوقت بتسد الاجزاء دي .

 

#ثالثا_تبريد_سائل_التبريد

وده طبعا زي ما هو واضح بيكون من خلال مروحه التبريد بس لازم نلاحظ أن مروحه التبريد الخاصه بالسياره رينو هي مروحه واحده ليها سرعتين 

يعني مش معني أنها بتلف قدامك أنها شغاله ممكن جدآ تكون بتلف علي سرعه واحده 

وده طبعآ يسخن العربيه 

 

#رابعا_تقليب_سائل_التبريد 

وده بيكون من خلال طلمبه المياه اللي بتاخد حركتها من حركه الموتور 

واللي لازم طبعآ مراجعتها دوريا مع كل صيانه كبيره لأن لو فيها مشكله هتسخن العربيات 

والطلمبه بتاخد العمر الافتراض بتاعها من اهتمامك بدائره التبريد زي إننا نحافظ دايما علي إستخدام سائل تبريد الخاص بالسياره وإننا ما نستخدمش المياه العاديه ابدآ

 

#خامسا_ورود_معلومات_خاطئه_عن_حراره_المحرك

وده سبب إن حساس الحراره بيدي قرايات مش مظبوطه نتيجه عطل داخلي فيه أو أن فيه أراضي للموتور محتاجه تقويه أو تنظيف .

 

وزي ما هو واضح للجميع أن السبب الأساسي والرئيسي في مشاكل تبريد المحرك هي عدم أستخدام سائل تبريد بالمواصفات الفنيه الصحيحه .