عصفور الجنة طار سكن جار الأفاعي حافظ على الأذكار وبمكايدهم ما واعي الفصل الرابع بعد ما ربنا رزق ولاد سعيد بأم صالحة، النار قادت في قلوب سعد ومراته وعياله، كيف يكونوا طوع أمرها ويفرقوا عن عياله؟ حاولت عايدة تزرع كُره العيال في قلب فاتن لكنها فشلت، فغيرت الخطة، استعانت بجوزها وسلايفها البنات وزرعوا الحقد في قلوب الصغار. بقوا ما بيسمعوش كلامها وبيعلوا صوتهم عليها، وبدل ما كانوا ينادوها "أمي" بقوا ينادوها "عمتي" كيف ما قالولهم الأفاعي. صبرت فاتن واتحملت؛ لجل رضا ربنا، لكن البلاء اشتد مع أول حمل ليها. حملت فاتن بأول مولود ليها، فرحت بهدية ربنا ليها، ولكن يا فرح ما تمت! اتفقت عايدة مع حريم عيالها إنهم يسقطوا فاتن؛ لجل ما تكون فلوس سعيد وشقاه ليهم. في عز الصهد والنار القايدة في الجو، حكمت على فاتن تشيل أردبين قمح وزيهم غلّة "ذرة"، وبعدها تقعد قدام الفرن تخبز معاهم خبيز الأسبوع. خلصت فاتن المطلوب منها وقعدت تخبز معاهم، ويدوب حست بمغص شديد في بطنها ووجع أليم في ضهرها، قامت حست بحاجة بتنزل منها، عقبال ما طلعت لغرفتها كان جنينها نزل منها. حزنت وجاتها الحُمّى، رقدت وما لاقتش اللي يخدمها في مرضها، بقت أمها هي اللي تجيها كل يوم آخر النهار؛ بعد ما تقضي مصالح بيتها، تشقر عليها وتطعمها وتسقيها المياه الباردة، لجل ما ترطب على قلبها العليل. سبوعين بالعدد واتعافت فاتن ورجعت تراعي مصالح البيت مع حريم ولاد سعد؛ رغم إنها مرات سعيد عمهم واللي خيره عليهم من ساسهم لراسهم. جه سعيد من الخارج وقعد مع فاتن كام شهر، ورجع تاني للغربة بعد ما سعد خد منه شقاه، وساب فاتن حامل في بذرته. خافت فاتن على جنينها ليقتلوه كيف ما عملوا مع أخوه، دعت ربها وفاضت عيونها: يا رب فاتن احفظ لها جنينها، يا رب يا علام الغيوب تعلم إني وافقت على سعيد لجل ما ترضى عني، يا رب بيحاربوني بدون وجه حق، طالني آذاهم وظلموني، يا رب احفظ جنيني اللي زرعته برحمي، يا رب لا تحرمني من شكر النعم والعطايا، يا رب أنت حسبي وأنت نصيري.. ما تسبنيش يا رب. رغم إن العيال اتسلطوا عليها إلا إنها فضلت محافظة على عهدها لربها؛ إنها تتاجر فيهم مع الله، حبتهم كيف عيالهم قبل ما يكون ليها عيال، فاضت عليهم بالحنان، عوضتهم الأمومة، حاربت عشانهم وصبرت عليهم. مرت الأيام ووضعت فاتن وليدها الأول، مولود جميل كيف البدر، وكأن الجمال سكن ملامحه الطيبة، هادي، طيب. يقولون إن الأطفال يبان فيهم الطيبة والشر من صغرهم، وفعلًا كل اللي كان يشوف ولد فاتن يحبه ويقول: الله أكبر على جمال الواد، طيب من أصل طيب "أصل الشيخ عز الدين". سعيد عرف بولادة فاتن واللي كانت هتموت فيها، وقال: سموه كارم، وبقت فاتن أم كارم. فرحت بوليدها فرحة الدنيا بحالها، لكن ورغم تعبها في ولادتها إلا إن عايدة وجوزها ما استحوش وسلطوا عليها العيال من جديد. كانت ولادتها في الحر، حر الصعيد القديم صهد، نار والعياذ بالله من النار، ومع ذلك عايدة ما وقفتش معاها ساعة طلقها ولا بعد ولادتها، ومنعوا حريم القرية تطلع لها، ومنعوا الداية، فضلت تطلق لحالها من صباحية ربنا لحد نص الليل، جاتها أمها كعادة كل يوم لاقتها بتموت حرفيًا، جريت على البيت خبرت جوزها الشيخ عز الدين، ما كدبش خبر وجري على بيت الداية أم جوزيف في القرية اللي جارهم. جت الداية وطلعت لها بأمر الشيخ عز الدين، وكانت أمها معاها بتشد أزرها، دخلت أم جوزيف وبكت على حال فاتن. ساعتين وكان كارم مشرف الدنيا ورج البيت بصراخه. فرحت أم زكريا "أم فاتن" ورجت بيت عبد العزيز بالزغاريد، ورجعت بيتها دبحت وطبخت ورجعت لبنيتها بأكل يرم عضمها ويصلب طولها. رجعت ومعاها رطلين سمنة بلدي بعد ما قدحتهم، وسقتهم لفاتن علشان تقوي قلبها. وعلى دا الحال كل يوم، لكن.. دوام الحال من المُحال. مريم توركان 17/5/2026
خبر عاجل: تم توثيق الموضوع:
ربيع البستان
تم التوثيق منذ:—

