خبر عاجل: تم توثيق الموضوع:
ربيع البستان
مدونة هاجر المنشاوي رقم التوثيق: 1,052
مدونة هاجر المنشاوي
منذ التوثيق—
  1. المنصة
  2. 🏠 مركز التدوين و التوثيق ✔
  3. 💎 الأعمال الموثقة
  4. رواية الحكواتي (حكاية ابن عبد العزيز) الفصل الثالث
شعار مشروع جدار المدونات

مدونات مركز التدوين والتوثيق

استمتع بقراءة أعمال عالية المستوى بقلم كتّاب مركز التدوين والتوثيق.

ابدأ بكتابة اسم الكاتب أو جزء منه، وستظهر لك المدونة المطلوبة؛ المدونات مرتبة هجائيًا.

ظلموك يا أبوي لاحباب وأنا إيه يا أبوي ذنبي؟ قلبي الصغير أهو داب والحزن ساكن عندي الفصل الثالث طغوا عليه واتجبروا خصوصًا بعد ما رجع بفلوس كتير، فلوس تشتري القرية بالبندر بتاعها، قرر سعيد إنه خلاص هايشتري 150 فدان ويشتري حتة أرض بأرقى أحياء القاهرة ويبني عليها برجين ويستقر هناك، لكن أبوه رفض وأخد الفلوس صرفها على نفسه وولاده وولاد وولاده. صرف مستقبل سعيد وشقا السنين وغربة وغياب، صرف دم وشباب ابنه الطيب الحنون. سعيد كان شكله مختلف عنهم، وطريقته وأسلوبه وحياته، حتى ملامحه مش شبههم خالص، اللي يشوفه يقول عليه خاطفينه من أهل غير دول، كانوا بيقولوا عليه المصراوي؛ إكمنه عاش واتربى في القاهرة، وكان جميل، بيهتم بنفسه ولبسه، حتى لهجته غير لهجتهم، كان بينادي الستات اللي من عُمر أمه بـ "يا طنط"، وينادي الرجالة الكبار بـ "يا أونكل"، كان طيب وحنون، طبعه هادي جدًّا ورومانسي في نفسه. كان دمه خفيف، عنده قبول رباني، وشه بشوش، بسمته صافية، عليه مسحة جمال رباني زادته فوق الحُسن حُسن. حاول بكل الطرق يرضي أبوه لكن الطبع غلاب، أبوه مش شايفه غير شوال فلوس وبس، وإخواته كذلك الأمر. قعد اجازته ورجع لغربته، بعدها بكام شهر اترج بيت عبد العزيز بصراح ندى، وهي بتطلق في مولودها الأخير. ندى، بنت بسيطة، كيف حريم القرية، أبوه حكم عليه يتجوزها غصب، رغم إنه كان نفسه ياخد بنت خالته المصراوية اللي شبهه وهو شبهها. اتجوزها علشان يراضي أبوه وداس على نفسه، ومع العشرة قبل بيها زوجة وحليلة، وجاب منها 3 عيال، ولدين وبنت، أمجد، أسمهان، ومدحت "آخر العنقود". حريم القرية كلهم متجمعين ببيت عبد العزيز لجل ما يقفوا مع ندى في شدتها، جاها الطلق شديد المرة دي وهي بتولد مدحت. مرت ساعات الليل الأولى وأخيرًا شرف مدحت الدنيا بقدومه. فرحت بيه ندى وكل مين يحبوها، وفرح بيه جده عبد الحميد، أما عبد العزيز فكان ولا على باله، وسعد كان مش شايف غير عياله ال13. مرت الأيام وماتت ست الحُسن المُصلية الذاكرة لله رب العالمين. ماتت وقلبها مفطور على ابنها سعيد، اللي أبوه بدد شقاه وضيع مستقبله. ماتت والحزن ساكن قلبها على غربة ابنها. ماتت وقلبها مليان خوف من بكرا على ابنها الطيب. بلغوا سعيد بموت أمه، نزل الخبر عليه دك كيانه وفطر قلبه، سكن الحزن قلب سعيد على فراق أمه، بكى كما الأطفال، لفظ وجع قلبه في صورة صراخ، صرخ وبكى، بكى وصرخ، ولكن ما حدش بيرجع من قبره بعد ما يقبروه. كبر الصغير مدحت وبقى عمره حولين، أبيض، جميل العيون مكحلهم، غزير الشعر بكثافة، شعره دهبي ناعم طويل واصل لتحت ودانه، لو شفته من بعيد حسبته بنت فاتنة الجمال! ماتت ندى بأزمة قلبية وهي في ريعان شبابها، ماتت ومدحت ابنها ابن الحولين إلا كام شهر. ماتت وأكبر عيالها التلاتة أمجد 12 سنة، وأسمهان 6 سنين. ماتت وكانت خايفة على عيالها من أهل أبوهم، وحصل اللي خافت منه؛ عايدة مرات سعد أخدت هدوم مدحت الغالية الجميلة وادتها لولاد ولادها، وأهملت مدحت الصغير، وعيالها شغلوا أمجد كلاف للمواشي، والبنت أسمهان كانت بتخدم حريم عيالها. بعتوا لسعيد جواب فيه الخبر وفيه طلب من عبد الحميد "عمه وأبو ندى"، طلب منه الحضور للضرورة، رجع سعيد فاقد الشغف للحياة، قلبة مفطور، نفسه خاصمته بعد رحيل أمه، أمه اللي راحت وخدت حتة من روحه معاها. حاولوا يجوزوه لكن ما حدش راضي يديهم بنته؛ الكل عارفهم منافقين وبوشين، ومش بيراعوا ربنا في بنات الناس، وحريمهم كيادة ورجالتهم ماشية بلسان حريمهم. لفوا وداروا والنصيب وقعهم في فاتن، بنت الشيخ عز الدين أبو إبراهيم، بنت ولا كل البنات، طيبة، مؤدبة، متربية أحسن تربية، متربية على الغالي، جميلة جمال رباني، كانوا أهل القرية ينادوها قبل جوازها بـ "العادرة"؛ من شدة حُسنها وطُهرها وتقواها. كانت عابدة، زاهدة في الدنيا، تحب ربها وتخشاه في السر والجهر، صوامة، قوامة، شجاعة في قول الحق. شعرها فاحم كيف الحرير، طويل لتحت كعوب رجليها، وشها مدور كيف القمر في ليلة تمامه، عيونها ملاح، نقية القلب والظن، طاهرة القلب والروح، عفيفة اللسان. في الوقت دا كان عز الدين بيمر بظروف صعبة، ولما اتقدم له سعيد "وهو ابن ابن عمه"، وافق بعد ما شارها. سألوها: كيف فاتن زينة البنتة ترضى بأرمل ومعاه 3 عيال، وأنتِ ولاد الأكابر رايحين جايين خُطاب ليكِ؟ قالت لهم: أنا موافقة عليه علشان عياله؛ نفسي أربيهم وأدخل بيهم الجنة، هتاجر فيهم مع ربنا سُبحانَهُ وتعالى. الكل سكت والصمت هو سيد الموقف. اتجوزت فاتن ست البنتة من سعيد في غرفة وحيدة من بيت عبد العزيز، سكنت هي وجوزها وعياله كلهم في غرفة واحدة مقسومة نصين، نص ليها هي وجوزها ونص للعيال. كانت غرفتها رغم ضيقها أفضل وأجمل غرف البيت كله، دايمًا بتخرج منها ريحة البخور والعطور، ودايمًا كانت مترتبة ومنظمة وهادية زي صاحبتها. من أول ما دخلت بيت عبد العزيز واللي مات بعد جوازها بكام شهر، حست بكُرههم ليها وغيرتهم منها وحقدهم عليها؛ لمجرد إنها مش شبههم في حاجة ولا هما كمان يشبهوها في شيء. كرهوها وبقوا يعايروها بصلاتها وقيامها! وإن صامت الأيام القمرية أو الاثنين والخميس ياكلوا منابها ويبيتوها بالجوع. حاولوا يطفشوها بكل الطرق لكنها صبرت؛ حسبةً لله. الكل لاحظ التغيير اللي حصل للعيال، بقت وشوشهم تضحك بعد ما كانت كئيبة، بقوا بيبرقوا من النضافة بعد ما كانوا متبهدلين، بقوا يتكلموا بأدب بعد ما كانوا بيسبوا ويلعنوا. واللي زاد من حقدهم عليها إن العيال بقوا ينادوها بـ "أمي". مريم توركان 16/5/2026