قلب الغزال مجروح دايب على همومه صبح كطير مدبوح كان اللَّه في عونه الفصل العاشر خلصت اجازة سعيد وعاد مطرح ما جه، كملت مليحة حياتها بنص قلب، أو قول قلب إلا ربع، ركزت أكتر في حلمها وسعت أكتر لهدفها. فوضت أمرها لله وطبقت قفصها الصدري على وجعها وكملت. مرت الأيام وكبرت مليحة وكلما ما تكبر تزيد ملاحتها أكتر، وصلت لسن الـ 17 ودي كانت السنة اللي شافت فيها سعيد لآخر مرة، قبل ما يروح وما يرجعش تاني. كانت مركزة في تعليمها ومش شايفة غيره قدامها، حاولوا القرايب يذلوها بكل الطرق لكن اللي معاه ربنا يمشي على المياه. صبرت وعافرت لحد ما بقى لها اسم وسُمعة، كيف ما عمل أخوها ماجد من قبلها، ومن قبله كارم ومن قبلهم فاتن. ماجد أخوها كان تؤام روحها وأفكارها، ما كانتش تعتبره أخ، كان هو أخوها وأبوها وصاحبها وحبيبها، كيف باقي إخواتها، لكن ماحد كان هو السند والعون ليها في كل حياتها، هو اللي كبر جواها حلمها وهو اللي رفض اللي القرايب بيعملوه. ماجد، الجميل، النبيل، الذكي ذكاء متقد، الواعي الفاهم، الحنون، الجدع بزيادة، الحامل كتاب الله العزيز، كان دايمًا يقف لسعيد لما أهله يسلطوه على مليحة ويحاول يتخانق معاها ويقعدها من التعليم. رجع سعيد من الغربة قعد شهرين ورجع مطرح ما جه وما رجعش تاني، كان وجوده زي عدمه، حي على الورق بس، قبر نفسه بقلب مليحة لما قتل حبها ليه بيده. مرت الأيام وزاد حقد وغيرة القرايب، بقوا يدبروا لها المكايد ليل نهار، لكن وما ربك بظلامٍ للعبيد. حاولوا كتير يبعدوها عن هدفها لكنهم ما قدروش، حاولوا يفرقوا بينها وبين حلمها لكنهم فشلوا. بلغت مليحة الـ 18 وحصلت ثورة الملاحة والأنوثة أكتر بجسدها، كانت مركزة في دروسها ومدرستها لكن القرايب مركزين معاها. اتقدم لها شباب بعدد شعر راسها، كلهم راغبين فيها طالبين رضاها، لكنها ما كانتش شايفة غير حلمها وبس. عماتها ما عجبهمش الكلام، كانوا بيبعتوا لها حريم تبعهم تهددها وتحذرها لو حاولت تكمل تعليمها. كل دا ما أثرش فيها قد ما أثر فيها أمر سعيد. كلموا سعيد وشتموه وقالوا له: البت طابت، مهرة فايرة لازمها خيّال، ما عندناش بنتة تتعلم، شباب البر كله والبلاد اللي حوالين يتمنوها ويحلموا بيها، نشوفولها حد ونرميها له. حاول سعيد يقف لهم لكن خوفه سبق شجاعته، بعد ما خلصت الثانوية العامّة قعدها في البيت، حاولت بكل الطرق تكمل تعليمها لكنه أقسم طلاق لو راحت من وراه الجامعة مش هيبعت لهم القرشنات ويطلق لها أمها. رضيت بقضاء الله وقدره، لكن أهله ما رضيوش، كانوا بيسلطوه دايمًا عليها يتصل يتخانق معاها وخلاص من غير سبب. حاولت تحنن قلبه عليها قالت له: دا أنت يا بابا اللي زرعت حب العلام بقلبي، فاكر يا بابا؟ لو على الفلوس مش هشيلك همي يا بابا، هجتهد وأستعير الملازم من صحباتي، مش هعولك همي خالص. رد عليها وقلبه معصور: مش على الفلوس، أنا معايا فلوس يا مليحة لو قادت فيها النار ما تحرقهاش، فلوس تعيش نسلي ملوك لـ 70 حفيد، إحنا ما بدناش منك شهادات وخلص الكلام وقفل السكة. مرت الأيام وسافر كارم يشتغل في دولة عربية شقيقة، كان مراقب على المهندسين، يستلم منهم الشغل يشيك عليه ويسلمه للمهندس الكبير. كان فرحان بالشقا، أخيرًا هيكون لتعبه نتيجة، يحوش له قرشين يستر بيهم أمهم وإخواته بعيدًا عن ذل وإهانة سعيد. اشتغل سنتين والشركة خلصت المشروع وقفلت، رجع كارم من الغربة ومعاه أمل لبكرا.. ولا يعرفش بكرا مخبيله إيه؟ مريم توركان 23/5/2026
خبر عاجل: تم توثيق الموضوع:
رواية الحكواتي (حكاية ابن عبد العزيز) الفصل العاشر
تم التوثيق منذ:—
