كسر الروح غالي وصبحت غريب يا قريب قلب العزيزة يلالي جرح القلوب مالو طبيب الفصل التاسع رجع سعيد من غربته ومليحة بنت الـ 14 سنة، رجع ولقى فاتن جوزت أسمهان من 5 سنين وجهزتها أفخم جهاز مفيش بنت جابت زيه في القرية كلها، رغم إن سعيد ما بعتلهاش فلوس الجهاز ولا كان بيبعت غير قرشنات لا تسد رمق ولا تكفي حاجة كل 7 شهور مرة، لكن كارم كان شايل مع أمه الشيلة، ربى معاها إخواته وبقى بيشتغل عليهم من صغرهم وفضلهم عليه. رجع سعيد بعد ما فاتن جوزت ابنه أمجد من 4 سنين، ورغم إنه مرر عيشتها هو والأفعى بنت عمه، إلا إنها صبرت حسبةً لله. مدحت خلص الخدمة العسكرية بعد ما خلص الثانوية، وسافر إسكندرية عاش واشتغل هناك وكان شايل نفسه، كان يهوى إسكندرية خالص خالص، ودا كان سبب كافي إنه يقعد هناك بالشهور ويعود يشقر على أمه وإخواته ومعاه الهدايا. ماجد كان بيدرس ويشتغل من صغره، ويحوش القرش على القرش لحد ما يوصل لتمن 2 كيلو فاكهة، كان ينزل البندر مخصوص يشتري 2 كيلو فاكهة ويدخل بيهم على إخواته يفرحهم وكأنه بيحل محل الأب الميت بالحيا. مليحة كانت قريبة من كل إخواتها، حتى أمجد كان يحبها زي عينيه قبل ما ياخد بنت عمه، واللي بتحسد مليحة وبتغير منها وبتحقد عليها. بعد ما خد بنت عمه صعرته على أمه اللي ربته وإخواته، خلته كيف الديب عليهم، قلبه أقسى من حجر الصوان. حتى أسمهان بعد ما دخلت بيت عمها قلبوها على فاتن وعيالها، بقت كارهاهم على كره عمها وعماتها ليهم. رجع سعيد بعد ما ركب تليفون أرضي بالبيت؛ لجل ما يسمعهم صوته عقبال ما ياجيهم كل 5 أو 6 سنين. رجع سعيد كعادته ضيف، يقعد شهرين ويرجع مطرح ما كان. رغم إن سعيد عايش برا مصر وشغال هناك إلا إن بيته باين عليه الفقر، لا فكر يبني البيت ولا حتى يجهزه بالأجهزة الكهربائية كيف ما عمل في البيت الكبير، اللي يمرر الحلق أكتر إنه كان في كلام داير إنه بيبعت لأحوه سعد فلوس! يفقر عياله علشان يغني أخوه، كان بيفكر في أخوه وعياله وعيال عياله ولا بيفكر في اللي جابهم الدنيا. كتروا الخُطاب اللي متقدمين لمليحة، زينة شباب القرية والقُرى المجاورة، اسم ورسم وحسب ونسب وعلام وغنى، أبوها رفض وقال: مليحة مش للجواز، مليحة هتعيش كدا لحد ما أموت. في يوم من أيام الشهرين اللي قاعدهم راح لإخواته ورجع كيف البركان الفاير، سب وضرب في فاتن من غير سبب يُذكر، مليحة حاولت تدافع عن أمها لكنه ضربها، اترمت بجسمها على أمها تاخد عنها الضرب وبعد ما دمها فار قامت فيه كيف الأسد الغاضب: بأي حق تضربها؟ هي ما عملتش حاجة تضرب عليها، كفاية ساتراك قدام الخلايق، البيت دا مفتوح بحس جدّتي الحاجة دليلة أم زكريا، القرشنات اللي عتبعتهم كل حين ومين ما عيقضوش الكهربا والغاز. حاسب نفسك، أنت مين؟ أنت واحد ما نعرفهوش! ضرب مليحة بالقلم حول حمار خدها لدم، كمل تجريح فيها: أنا أبوكِ يا فاجرة، أنا اللي لحم كتافك من خيره، أنا اللي كبرتك وفي الآخر هتكوني لواحد تناميله وتفتحي رجليكِ، أنا سعيد ولد عبد العزيز، طول عمري شقيان عليكم. في اللحظة دي حست مليحة بخنجر اتغرز في قلبها، سكتت خالص وما عادش يسمع لها حس. 22/5/2026
خبر عاجل: تم توثيق الموضوع:
رواية الحكواتي (حكاية ابن عبد العزيز) الفصل التاسع
تم التوثيق منذ:—
